這是一首歌頌上帝chiah是土地ê主,無上帝ê允准,任甚麼人mā無法度tī土腳安居、佔有ê詩歌。Chit首詩歌後來常常hông用tī新年ê時chūn歌頌。
第1到2節,詩歌一開始,詩人就大聲呼籲所有ê人lóng tio̍h來高聲歌頌上帝。因為chit位上帝是「至koân ê上主」,全世界lóng是屬tī祂ê。原因是祂是創造宇宙萬物ê主宰。
第3到4節,詩人講beh歌頌上帝ê原因,是因為所有ê氣力tùi上帝來賞賜,包括土地lóng是。因為án-ne,ē-tàng tī統治ê土地頂面安居,就應該tio̍h感謝上帝。
第5節kah撒母耳記下第六章15節有密切關係,因為所用ê字句lóng有歡呼吹號。Tī撒母耳記,記載大衛帶上帝ê約櫃進入耶路撒冷,包括大衛kah所有以色列人民,lóng高聲歌頌上帝。
第6到9節,「上帝坐tī寶座頂面」,chit句話表示兩種意義,一是teh指耶路撒冷聖殿,因為聖後面有約櫃,這表明是上帝顯現ê所在;二是teh指天頂。詩人用chit種方式teh表示:chit位創造宇宙萬物ê上帝,是至koân ê,無法度用人ê氣力來比並。大家lóng tio̍h順服祂ê領導,因為只有祂chiah是萬王之王。
|