詩篇 41章1節 到 41章13節   背景資料  上一筆  下一筆
Chit首詩mā是詩篇所有150篇中第一段落ê最後一篇(第一篇到四十一篇)。詩篇第一篇講tio̍h聽從上帝旨意ê人「有福」,chit首詩mā是tùi「有福」講起。詩人所謂「有福」,是因為得tio̍h上帝ê眷顧。性命有上帝眷顧ê人,即使是tī患難中,mā會得tio̍h興旺ê氣力。

Chit首詩歌就ná親像《現代中文譯本》tī起頭標題所寫ê,是「一個病人ê祈禱」,詩人teh祈求上帝醫ê詩歌。M̄-koh chit種病並m̄是身軀上ê,卻是心靈上ê,á是心內ê。是詩人被知己朋友出賣ê時所寫ê詩歌,而chit種痛苦大大超過肉體上ê病痛。

有kóa詩篇學者認為chit首詩篇是大衛所寫ê,原因是伊ê kiáⁿ押沙龍叛變竄位,而伊siōng好ê幕僚亞希多弗竟然走去當押沙龍ê參謀(參考撒母耳記下十六:15、23),koh khah hō͘大衛無法度容忍ê,就是押沙龍為tio̍h beh表示伊竄位成功,iáu tī王宮ê平頂上公然kah大衛ê疼妃做愛(參考撒母耳記下十六:22),chit款tāi-chì無論發生tī任何人身上,lóng會感覺痛心疾首。

第1到3節,chia一開始就講tio̍h「關心窮苦人ê人」就是有福氣ê人。Chit種人就是tī回應上帝揀選ê疼。因為án-ne,上帝mā會關心chit種人。

Koh講,chia所講ê「窮苦」,m̄是只有指金錢、財物上ê,iáu包括人ê軟弱、無助、孤獨、困境等。詩人講會關心chit種人ê人,一定會得tio̍h上帝ê幫助作為回報。

第4節,詩人向上帝表示伊「得罪」上帝,這hō͘人真緊to̍h想起大衛王tī犯姦淫罪了後,tī詩歌中mā是án-ne表達(參考五十一:3—4)。Chia ê「得罪」ê意思,是表示故意用惡質ê計謀陷害別人ê性命。

第5到6節,詩人tī chit兩節詩歌中提起仇敵惡質ê行踏,m̄-nā講毀謗伊ê話,而且一再ê詛咒伊死去。

第7到8節,chit兩節繼續說明仇敵怎樣對詩人設計陷害,就是故意用siōng惡質ê手段講kóa毀謗ê話,只為beh hō͘詩人因為án-ne忿恨來死。

第9節,chit節是詩人向上帝表明身心痛苦ê原因,就是連家己siōng知己ê朋友mā出賣伊。這若是大衛所寫ê詩歌,án-ne就是伊siōng好ê幕僚亞希多弗出賣伊,而家己ê大kiáⁿ背叛伊。Tī新約福音書siōng出名ê例,就是猶大出出賣耶穌。

第10節,chit節真需要注意,因為詩人祈求上帝hō͘伊康復,thang hō͘伊向仇敵報復。其實,詩人ê意思是請求上帝醫伊,hō͘伊thang tùi chit種被敵人陷害ê困境中行出來。只要伊ē-tàng行出chit種性命困境ê陰霾,就等於是teh報復敵人ê陷害仝款。卻m̄是親像文字上所寫ê,tio̍h用仝款ê方式去報復。

第11到12節,詩人向上帝懇求,只要上帝幫助伊,想beh陷害伊ê氣力就會消失,án-ne,伊就ē-tàng lóng無驚惶地khiā立tī上帝面前,hō͘ beh陷害伊ê人感覺見笑萬分。第12節ê「廉潔自守」,這表示伊tī上帝面前是一個誠實者,對上帝絕對忠實。

第13節,chit句ē-sái講是詩篇第一集ê總結。詩篇ê每聚集尾lóng是用chit句型(參考詩篇七十二:19、八十九:52、一○六:48、一五○:6)。



重新查詢 專卷研經 詩篇系列
錯誤回報,請聯繫