詩篇 36章1節 到 36章12節   背景資料  上一筆  下一筆
有kóa學者認為chit首詩篇是由三篇獨立ê短詩組合而成ê。一是tùi第1到4節,chit首詩歌是哀歌。二是tùi第5到9節,這是單純ê詩歌。三是第10到12節,這是一首祈禱ê詩歌。M̄-koh mā有其他學者認為這是一首屬tī智慧文學ê詩歌,討論到人kah上帝之間ê關係。

第1到4節,chit段詩歌真清楚說明人ê心中有想要犯罪ê念頭,就是想beh脫離上帝ê教示。Siōng典型ê心態,就是認為上帝看bē-tio̍h,á是根本就無懲罰。心中所想ê lóng是邪惡,連躺tī床頂mā是teh圖謀tio̍h邪惡ê事。Ná親像先知彌迦tī kā伊譴責hit時代ê邪惡者仝款(參考彌迦書二:1)。

第5到9節,chit段詩歌kah前一段詩歌呈現完全無相仝ê內容。Tī chit段詩歌中,詩人teh歌頌上帝有「無變ê疼」。詩篇中一再出現形容上帝有「無變ê疼」ê詩句(參考十三:5、廿五:6、廿六:3、三十一:7、五十二:8、六十一:7、八十五:7、八十九:28、九十八:3、一○三:8、一○七:43、一一九:76)。詩人māài kā「無變ê疼」ê上帝,用「信實」來表達,說明對約ê重視,ná親像祂「無變ê疼」仝款。因為án-ne,「無變ê疼」時常會kah「信實」chit兩個詞句連tio̍h同齊用(參考廿五:10、四十:11、五十七:3、一一五:1、一三八:2)。

每pái聖經講tio̍h上帝ê「信實」ê時,表示上帝是一個守約ê上帝。祂永遠會記得kah世人所立ê約,而且會堅持守tiâu(參考創世記廿四:27,申命記六:23、七:8、12、八:18、九:5,約書亞記廿一:45,撒母耳記上十二:22,耶利米書廿九:10、三十二:22、三十三:14)。

值得注意ê是第6節,詩人講上帝m̄-nā看顧人類,祂同時mā看顧所有「cheng-seⁿ」。因為上帝是一切性命ê來源,只要tī上帝ê內面,就會看見性命ê亮光(第9節)。

第10到12節,所謂「認bat」,是teh指遵照上帝旨意做tāi-chì ê人。只有確實去遵行ê人,chiah是真正認bat上帝ê人。「眷顧」一詞,表示「延長性命」ê意思。

第11節,chit節是第1到4節ê濃縮句,描述心中無上帝ê人,就是驕傲、作惡ê人chiah會有ê行為。第12節詩人講chit種人,一定會受tio̍h上帝嚴厲ê懲罰,結果就是倒地不起。


重新查詢 專卷研經 詩篇系列
錯誤回報,請聯繫