詩篇 30章1節 到 30章12節   背景資料  上一筆  下一筆
這是一首個人ê感恩詩歌,詩人真可能是因為患tio̍h重病得tio̍h醫後,獻上chit首感恩ê詩歌。

第1到3節,詩篇中ê「仇敵」,並無一定是teh指帶兵器來攻打ê對象,它往往teh代表重大破病,á是任何威脅tio̍h性命ê氣力lóng是。Chit首詩ê開始,就講上帝拯救伊,hō͘危害伊性命ê「仇敵」m̄敢pôaⁿ過雷池一步。Chia ê「救」一字,mā有「拔出」、「搝(khiú)起來」ê意思。Á tī chia所用ê「仇敵」是用複數名詞,因為án-ne,mā teh表示病情真嚴重。Tùi第3節thang看出詩人bat面臨死亡,佳哉上帝及時伸出醫ê手,hō͘伊tùi死亡ê邊緣轉tńg來。

第4到7節,tī第4節詩人提起「忠貞子民」一詞,這tī詩篇中一再重複出現(參考十二:1、十六:3、10、三十一:23、三十七:28、五十:5、七十八:8、八十九:19、一一九:5、一三二:16、一四九:1)。Chit-ê詞表明無論jōa-ni̍h-á惡質ê環境下,iáu是有一kóa對上帝絕對忠實ê子民,上帝一定會看顧,tī患難中會伸手救助。只有tī上帝ê庇護之下,chiah ē-tàng享受真實ê平安。失去上帝,等於喪失性命仝款。

第8到12節,Tī chit段詩歌中,詩人用了真chē求救ê詞彙,包括有「呼求」、「懇求」、「垂聽」、「不緘默」等。當詩人得tio̍h上帝ê拯救,脫離死亡後,伊第一件事,就是「歌唱頌讚」上帝ê救恩,而且是beh永遠歌頌落去。

Chit首詩後來被猶太人用teh記念被敵人俘虜去做奴隸ê經驗,in tùi受掠之地tńg來後,感覺家己kah-ná tùi死亡ê邊緣行tńg來仝款。特別是in tī主前164年,tùi希臘統治者安提阿哥依皮法紐四世手中奪回耶路撒冷聖殿ê時,kā聖殿重新清除清氣後,唱出chit首詩歌,表明in心中ê感恩,ná親像一個差一點á死去ê病人得tio̍h痊癒後一般ê歡喜。

重新查詢 專卷研經 詩篇系列
錯誤回報,請聯繫