詩篇 145章1節 到 145章21節   背景資料  上一筆  下一筆
這mā是一首o-ló ê詩歌,是一首teh歌頌上帝ê偉大kah慈愛ê o-ló詩歌。Á以第10節達tio̍h siōng高峰,to̍h是所有受造物lóng tio̍h歌頌o-ló上帝ê偉大。Chit首詩mā是一五○篇ê詩歌中,惟一ê一篇是用希伯來文標題寫「o-ló詩」ê詩歌。它kah第九篇、第十篇、第廿五篇、第三十四篇、第三十七篇、第一一一篇、第一一二篇、第一一九等詩篇仝款,每句詩ê開始lóng是根據希伯來文字母ê順序排列寫做ê。希伯來文ê字母有22個,m̄-koh tī chit篇ê第13節因為連續用了兩個字母,因為án-ne,變成只有21節。不過tī第13節卻看tio̍h兩組詩句。

	第1到3節,chit段詩歌是chit首詩歌ê引言,詩人表示伊beh「宣揚」上帝ê「偉大」。第1節ê「我ê上帝」、「我ê君王」chit種用詞,真清楚teh表明上帝就是伊ê王。因為án-ne,chit首詩歌mā是以色列民族共同在吟頌ê詩歌,上帝就是in ê君王。Á第2節ê「ta̍k工」,表示永遠bē間斷ê意思。第3節ê「無法度測量」,是teh指大大超過人ê能力所ē-tàng想像之範圍ê大(參考約伯記五:9、九:10)。

第4到7節,chit段詩歌ê用句,包括「大能ê事蹟」、「榮耀」、「奇妙ê作為」、「大能」、「公義」等用詞,其實lóng是teh說明上帝拯救ê奇妙,chiah-ê lóng kah帶領以色列人民離開埃及,á是kā in因亡國而四散到世界各地去,重新聚集做伙,帶領in tńg去故鄉,重建家園有關。

第8到9節,thang看chit兩節為chit篇詩歌ê中心,表明上帝ê慈愛,是「慈悲、憐憫、不輕易受氣、滿有無變ê疼」,而且chit種愛,是「kah tī一切被造物」,mā就是萬物lóng充滿tio̍h上帝ê慈愛。

第10到13節a句,chit段詩歌tī第11節提起上帝ê「主權ê榮耀」、第12節「國度ê榮耀」,這表示上帝就是君王,tī祂掌理之下ê國家,會永遠存在。

第13節b句到20節,只要講tio̍h上帝ê慈愛,必定會講tio̍h上帝ê「信實」,表示上帝kah祂揀選ê人同在,mā表明上帝一定會嚴守所立ê約,永bē改變。

Tī第14節、第17節、第20節等等lóng teh表明上帝作為君王ê特性,就是主持公義,對弱小者kā它保護,bē發生弱肉強食ê事。因為上帝會「垂聽」求告祂ê人,會「成全敬畏」祂ê人ê「心願」。

第21節,詩人tùi家己歌頌上帝,進一步koh呼籲所有「被造物」lóng tio̍h同齊來歌頌上帝ê偉大kah慈愛,tio̍h歌頌上帝ê「聖名」。

重新查詢 專卷研經 詩篇系列
錯誤回報,請聯繫