詩篇 14章1節 到 14章7節   背景資料  上一筆  下一筆
Chit首詩kah第五十三篇ē-sái講是仝款ê一篇,除了第十四篇ê 5到6節kah第五十三篇5節有明顯差別外,其餘差不多lóng仝款。第十四篇是採用「耶和華」ê名稱呼上帝,而第五十三篇採用「伊羅以」ê名稱呼,表示詩人ê背景無仝。

另外一個特點,是chit首詩有先知文學ê韻味,親像第1到3節開始chit句型就是真典型ê先知語句,看有甚麼人是真正對上帝忠實。

第1到3節,chit首詩歌開始就講「狂傲人自言自語:無上帝」,chit種句話kah箴言第一章7節:「敬畏上主是智慧ê開端。愚戇ê人輕視智慧,mā無願意學習。」tú好是相對ê型態,相對tī智慧一詞,就是愚戇。詩人講愚戇ê人m̄相信有上帝,mā bē認bat上帝。

Chia講「狂傲」(á是愚戇),意思是teh指hiah-ê頭腦簡單,無有思想ê人,chit種人就是kā認bat上帝ê事置之腦後,認為上帝甚麼事lóng m̄知道,kā家己看做siōng偉大。

「人人偏離正路;ta̍k個仝款ê腐敗」,chit句詩歌真清楚說明基督教信仰ê重要認bat:每一個人tī上帝面前lóng是罪人。使徒保羅引用了chit種觀點(參考羅馬書三:23),說明耶穌降生到世界起來ê原因。

第4到6節,tī chia上帝問一個問題:人為甚麼ài hit種無知?認為上帝m̄知、看bē-tio̍h,甚至根本就不存在。會有án-ne想法ê人,就是心中根本to̍h無上帝ê人。因為聖經一再見證chit位創造宇宙萬物ê上帝,是無所不能、無所不在、無所不知ê上帝。因為án-ne,心中有邪惡念頭ê人,必定無法度逃過上帝ê目睭,當伊想beh陷害人ê時chūn,上帝會出手救助被壓迫ê人。

第7節,kah tùi巴比倫回鄉ê時代有關,in相信過去ê失敗,是因為bē記得上帝。Taⁿ上帝看見、mā聽見了in悔改呼求拯救ê聲音。因為án-ne,上帝出手責罰hiah-ê欺負in ê強國,特別是當hiah-ê強國誇耀家己ê能力ê時,上帝必定會出手打擊,並同時拯救以色列人民重回故鄉建造家園。

重新查詢 專卷研經 詩篇系列
錯誤回報,請聯繫