詩篇 137章1節 到 137章9節   背景資料  上一筆  下一筆
這是一首亡國了後寫做ê詩歌,mā是屬tī哀歌,內容充滿哀怨、感傷。

第1到3節,這真清楚是以色列人民被掠到巴比倫去做奴隸ê時唱出來ê詩歌,時間應該是tùi主前597年第一批受掠ê人開始算起,一直到主前586年耶路撒冷淪陷止。以西結書第一章1節講in ê集中營是tī巴比倫ê「迦巴魯河邊」。因為án-ne,chia第1節講「巴比倫河畔」,可能就是teh指chit-ê「迦巴魯河邊」。Tī第2到3節ē-tàng看出奴隸ê悲哀,就是除了tio̍h努力工作外,有ê人(真可能是婦女)就成做娛樂巴比倫人ê女婢,甚至是「性奴隸」。巴比倫人侮辱以色列人民ê方式,就是ài in唱「錫安ê歌」,這增加in心內ê痛苦。

第4到6節,亡國ê心痛,已經無法度唱出歌頌上帝ê詩歌,而這to̍h是俘虜in ê巴比倫人想beh聽ê,這是teh侮辱以色列人民,講in所拜ê上帝無法度庇護in免受災害。換句話講,巴比倫人是teh講以色列人民所拜ê上帝無用ê意思。M̄-koh詩人iáu-koh堅信,上帝是真實ê,上帝一定會記tiâu in。

第7到9節,chit三節詩歌是teh控訴以東人kah巴比倫人。以東人ê惡質行為thang tùi俄巴底亞書第10到14節;約珥書第三章19節;耶利米書第四十九章7到22節;以西結書第廿五章12到14節等等處經文看出,詩人祈求上帝對以東人進行懲罰,因為in趁巴比倫人攻擊耶路撒冷城ê時,幸災樂禍,而且是當巴比倫人ê殺戮幫手。

第9節真特別,chit節詩人講tio̍h kā巴比倫人á是以東人ê嬰á摔tī石頭殼頂ê人,是有福ê人,chit種講法並m̄是講in tio̍h án-ne做,卻是teh說明以色列人民所tú-tio̍h ê遭遇,就是巴比倫軍隊攻入耶路撒冷城內ê時,只要聽見嬰á啼哭,in就用chit種方式進行殘酷ê手段屠殺嬰á。因為án-ne,詩人祈求上帝,用巴比倫人ê方法懲罰in。這mā是舊約摩西律法中所提起ê「以眼還眼、以牙還牙」之懲罰á是報復方式。

M̄-koh咱知影tī耶穌基督內面,chit種報仇思想m̄是基督教信仰ê本質,因為耶穌ê教示是「tio̍h疼lín ê仇敵,並且為迫害lín ê人祈禱」(參考馬太福音五:44)。使徒保羅mā講:「Tio̍h 祝福迫害lín ê 人;tio̍h kā in祝福,m̄ -thang kā in 咒詛。(全民版)」(羅馬書十二:14)
重新查詢 專卷研經 詩篇系列
錯誤回報,請聯繫