詩篇 136章1節 到 136章26節   背景資料  上一筆  下一筆
這是一首o-ló上帝ê偉大,kah感謝上帝拯救以色列人民脫離埃及,進入應允ê迦南地之詩歌,mā是一篇真美ê「史詩」,kah詩篇第一三五篇ê內容真接近。Chit首詩歌有一個真明顯ê特色,就是每pái ê回應句lóng是「伊ê慈愛永遠長存」。Chit種寫法有一個用意,就是主領敬拜ê長老á是祭司,念第一句,民眾就續落來回應chit句「祂ê慈愛永遠長存」。詩歌ê主題khǹg tī出埃及ê救恩史上,mā thang tùi chia看出以色列人民對出埃及ê事件看kah非常重要。

Chit首詩篇thang分做四個主題:一是第1到9節,講述上帝創造ê偉大;二是第10到15節,描述上帝帶領以色列人民脫離埃及ê轄制;三是第16到22節,講述上帝帶領以色列人民經過曠野了後,進入迦南地;四是第23到26節,o-ló上帝有永遠ê慈愛,無因為以色列人民犯罪就棄sak in,m̄-nā繼續照顧,mā繼續養飼in。

第1到9節,tī前三節真清楚表明,chit位慈愛ê上帝,是高居萬神之上。Mā就是講除了chit位創造宇宙萬物ê上帝外,無其他ê神。其它外國所崇拜ê神lóng是虛假ê。因為án-ne,大家tio̍h感謝ê是chit位真實ê神。

第4節ê「行大神跡」,就是用上帝ê創造來說明,上帝ê創造表明祂特有ê智慧,m̄是人ê知識所ē-tàng領悟、明白,因為實在太深奧。這包括第5到9節所提起ê「諸天」(表示浩瀚ê宇宙)、「深水」、「大地」、「日頭kah月娘」、「星宿」、「日時kah暗夜」等。Tī上帝奇妙ê手管理之下,一切運轉lóng真順利,井然有序。

第10到15節,chit段詩歌講述上帝「伸出」祂「堅強ê手kah膀臂」帶領以色列人民離開埃及,並且用祂奇妙ê雙手kā「紅海ê水」分開,hō͘以色列人民ē-tàng平安地行過去,m̄-koh卻「淹滅了埃及王kah伊ê軍隊」,chiah-ê歷史記錄lóng thang tùi出埃及記第十二到十四章看會tio̍h。

第16到22節,chit段詩歌kah以色列人民離開埃及進入曠野了後ê記事有關。第17到22節chit段詩歌kah詩篇第一三五篇10到12節仝款,thang參考民數記第廿一章21到26節、33到35節,lóng有詳細ê資料。

第23到26節,這第23節是真有意思ê一節詩句,mā說明基督教信仰ê要義:上帝m̄是只tī咱成功ê時chūn kah咱同在,tī咱失敗、痛苦ê時chūn,祂也kah咱做伙,一直陪伴咱行過siōng艱辛ê性命旅程,ná親像祂從來m̄-bat hiat-ka̍k以色列人民仝款,chit點chiah是基督教信仰siōng精華ê所在。

第23到24節mā是teh隱喻以色列棄sak上帝後,被掠到巴比倫去做奴隸ê時,上帝iáu-koh kah in做伙。

第26節回應了第1節,呼召所有民眾beh來感謝上帝ê大慈愛。

重新查詢 專卷研經 詩篇系列
錯誤回報,請聯繫