詩篇 119章1節 到 119章80節   背景資料  上一筆  下一筆
詩篇第一一七篇是siōng短ê一篇,而第一一九篇是詩篇裡siōng長ê一篇詩歌。總共有176節,thang分做廿二段,每段有8節,而且lóng是對句。Tī這廿二段詩歌,就是照希伯來文22個字母ê順序寫做ê。每段中ê每節mā lóng用仝款ê字母開始。 

另外一個特色,就是長到176節ê詩句,主要內容就是tī稱頌上帝ê律法kah教示。因為án-ne,mā hông稱做是「智慧詩歌」。

Tī詩篇中,chit種用字母ê順序寫做ê有:第九篇、第十篇、第廿五篇、第三十四篇、第三十七篇、第一一一篇、第一一二篇,以及第一一九篇等。有人認為 chit首詩是kā詩篇第十九篇7到13節o-ló上帝律法ê美hō͘ in擴大發揮。因為是長到176節詩句,因為án-ne,真可能它原本m̄是用來吟唱ê,是提供給人閱讀ê。作者kā舊約聖經siōng主要ê八個描述上帝律法ê字彙充分引用tī chit首詩篇中,這八個字是:律法、法度、訓詞、命令、誡命、典章、律例、話等。

第1到8節,這是第一段詩歌。開始就講行為lóng遵守上帝律法、順從上帝命令ê人,是有福ê人,這tú好kah詩篇第一篇1節ê起頭仝款。詩人Tī chit段詩歌一再表示想beh學習認bat上帝ê律法誡命,渴望ē-tàng忠實地遵守,祈求上帝m̄-thang棄sak伊。其實,上帝kan-taⁿ會棄sak hiah-ê故意違背祂ê律法誡命ê人,bē棄sak確實beh遵行ê人。

第9到16節,這是第二段詩歌。詩人可能tī少年歲月中有kóa特別ê經驗,因為án-ne對少年一代ê人提出勸勉,若in想過純潔ê生活,就只有遵行上帝ê律法誡命chiah ē-tàng。Á這方法就是kā上帝ê話謹記在心中bē bē記得,就ē-tàng排除tī無注意中間得罪上帝。詩人一再表示對上帝ê話ê渴望kah欣慕,一直無停在學習。

第17到24節,這是第三段詩歌。Tī chit段詩歌中thang看tio̍h詩人所面對ê,是誘惑力非常大ê環境,甚至面對tio̍h統治者ê壓迫,因為án-ne,koh khah hō͘詩人發見有上帝ê話,就有夠額ê氣力thang抵擋chiah-ê誘惑kah壓力。詩人講在世間ê時間是目nih-á ê,ná親像「客旅」,時間真有限,因為án-ne,祈求上帝hō͘伊thang明白,án-ne伊就m̄免擔憂因為認知不足而受tio̍h「侮辱kah咒罵」。

第25到32節,這是第四段詩歌。Chit段詩歌ē-tàng看出詩人kah-ná面臨非常大ê困境,伊bat被「擊倒tī土粉上」,mā bat「被憂愁所困擾」,chiah-ê已經teh暗示詩人差不多是接近死亡ê邊緣,m̄-koh即使án-ne,mā都無改變伊堅持beh學習上帝ê話ê決心。因為án-ne,伊期待ē-tàng「了解」上帝ê律法,學習其中ê「奧秘」,án-ne,伊就會知影「選擇真理ê道路」,遵行上帝ê教導而bē致使蒙羞。

第33到40節,這是第五段詩歌。Tī chit段詩歌中,詩人祈求上帝親自教導伊「律法ê真義」,hō͘伊明白,thang hō͘伊一生日子lóng「頭尾遵守」。詩人mā kā上帝ê律法誡命用來kah誘人眼目的金錢相比,伊寧可學習上帝ê話語,因為有上帝ê話語,就會「贏過貪慕錢財」,因為錢財是虛幻ê。伊祈求上帝hō͘伊新性命,chit種新性命是藉tio̍h上帝ê公義所賞賜得tio̍h ê。

第41到48節,這是第六段詩歌。詩人可能面臨困境,因為án-ne,祈求上帝拯救伊。Tī chit段詩歌中,詩人mā充分表示因為上帝對伊顯示慈愛,伊beh為上帝這拯救ê疼做見證,因為上帝ê話語救了伊,án-ne,伊m̄-nā是teh侮辱伊ê人面前,甚至tī君王面前伊mā會為上帝ê話語做見證。因為伊以明白上帝ê話語為樂,喜愛上帝ê話語贏過一切。伊深深知影,有上帝ê話tī伊性命中,就有希望。

第49到56節,這是第七段詩歌。Tùi chit段詩歌thang清楚看見詩人不時受tio̍h「驕傲ê人不斷來侮辱」,伊iáu-koh無為所動,堅持beh遵守上帝ê命令。因為伊知影ē-tàng tī患難中得tio̍h安慰ê氣力,是tùi上帝來ê話語,而且因為有上帝ê話語滋潤,性命就ná親像新性命一般,帶來新ê希望。雖然tī「世間寄居」ê時間真短,無法度留落來甚麼,m̄-koh詩人表示就算有chit種限制,伊iáu是beh寫詩歌來o-ló上帝,因為上帝ê話語ná親像伊性命ê詩歌一般。

第57到64節,這是第八段詩歌。詩人發願,beh盡一生ê氣力遵守上帝ê話語,伊chit種決定,是經過「反省家己所行ê路」了後ê心得,因為án-ne「決意轉向」上帝ê法則。雖然tī性命ê旅程中,bat有過「作惡ê人用繩索捆tio̍h」伊,想beh hō͘伊放棄上帝ê律法誡命,m̄-koh伊都無bē記得。M̄-nā án-ne,伊所結交ê朋友lóng是「敬畏」上帝,知影「遵行」上帝律法ê人,伊mā看tio̍h在世間到處lóng「充滿tio̍h上帝無變ê疼」。

第65到72節,這是第九段詩歌。 詩人過去bat誤入歧途,違背上帝ê命令。M̄-koh上帝ê疼贏過伊所犯ê錯誤,並且用祂ê話語來開啟詩人ê心靈,hō͘伊明白有上帝ê話語,就bē受tio̍h誘惑,雖然hiah-ê攻擊伊ê人,造謠生非,伊mā bē受tio̍h影響,改變遵守上帝ê話ê應允。伊mā明白因為犯過錯受tio̍h上帝ê「責罰」是對伊「有益」ê。伊體會出只要有上帝ê「律法」,就會「贏過世間千萬金銀」ê價值。

第73到80節,這是第十段詩歌。詩人用上帝創造人ê形像說明,有上帝ê話語tī人ê身上,就ē-tàng顯明上帝形像ê珍貴,ē-sái所有看見ê人,lóng會歡喜。因為上帝ê形像表明上帝ê疼,而且chit種愛是永bē改變ê。上帝ê話,是創造ê話,mā是公正審判ê話,是責罰,mā是信實。


重新查詢 專卷研經 詩篇系列
錯誤回報,請聯繫