詩篇 115章1節 到 115章18節   背景資料  上一筆  下一筆
Chit首詩篇mā是歌頌、o-ló上帝ê詩歌。通常唱chit首詩歌ê時,是用輪唱ê方式來進行。Tī希臘文kah拉丁文ê翻譯本聖經lóng kā詩篇第一一四kah Chit篇合併做伙。原因是認為前者為出埃及ê感恩詩歌,這第一一五首則續接歌頌,雖然bat tú-tio̍h阻礙、挫折、鬱卒,ná親像以前ê祖先tī埃及經過苦難ê日子,上帝iáu是帶領in出埃及。chit-má,上帝iáu是親像以前仝款,teh帶領祂ê子民。不過,kā chit兩首合併做伙ê作法並無普及tī其他聖經學界。Chit首詩ê唱法是:tùi第1到8節,由民眾來唱,然後tī第9到11節改由祭司唱。接落去第12到13節由民眾唱,然後第14到15節換祭司唱,最後第16到18節由民眾唱。

第1節,koh一pái強調上帝有「信實無變ê疼」,chit點mā ē-sái講是kui本聖經ê中心信息之一。

第2到8節,chit段詩歌以第2節ê詢問句開始,問tio̍h為甚麼大家lóng問「Lín ê上帝tī tó位?」chit-ê問題。會有這問題出現,真明顯ê,是詩人á是以色列人民被掠到外國去做奴隸,hō͘人嘲(sau)笑、譏諷ê時,in不時聽tio̍h ê(參考歷代志下三十二:14,詩篇四十二:3、10、七十九:10)。然後詩人用真正天頂上帝kah人ê手所造ê偶像神明,完全無相仝ê情景來對照。

第4到7節描述人ê手所製造出來ê神明,是虛假ê,無法度動ê。Chit種描述方式thang參考詩篇第一三五篇15到17節;以賽亞書第四十四章12到19節;耶利米書第十章3到5節等等。

第8節是祈願句,意思是teh指製造偶像神明hō͘人崇拜ê人,結果就會親像in所造出來ê偶像神明仝款,只有ē-tàng親像半遂者一般,無法度彈動。

第9到13節,Tī chit段詩歌中一再呼籲上帝ê子民一定會「信靠上主」,因為上帝beh「賜福hō͘敬畏伊ê人」,chia是kā「敬畏」kah「信靠」相連接做伙。知影信靠上帝ê人,一定會知影chit位上帝是真實ê,m̄是虛假ê偶像神明。因為án-ne,清楚chit件事ê人,就會心存敬畏ê態度。所謂「敬畏」,指ê是用真心實意ê態度敬拜上帝,獨獨敬拜chit位真實ê上帝,bē去跟tòe虛假ê神明,即使是一點點á念頭mā bē出現。

Tī chit段詩歌中mā提起「以色列人」、「眾祭司」、「敬畏」上帝ê人等,chit三種其實lóng tī指認bat上帝ê人,而且是thang幫助人來認bat上帝ê人。

第14到18節,chit段詩歌說明知影敬畏上帝ê人,一定會得tio̍h上帝ê賜福,性命充滿tio̍h力量。Á第16節mā講出上帝kah人之間是有差別ê;chia講上帝是屬天ê,人是屬地ê。換句話講,真正上帝,是bē受tio̍h人間ê標準、價值影響ê。詩人Tī chit段詩歌ê最後強調:當人iáu活teh ê時chūn,就beh知影歌頌、o-ló上帝。

重新查詢 專卷研經 詩篇系列
錯誤回報,請聯繫