詩篇 107章1節 到 107章43節   背景資料  上一筆  下一筆
Chit首詩篇thang分做三個部分一是第1到3節;二是第4到32節,這部分是由四種遇tio̍h無仝苦難ê詩人向上帝祈求憐憫、看顧而吟唱ê哀歌,chit四種就是(1)失迷方向ê人,in行m̄-tio̍h去道路,致使性命陷入危險中(第4到9 節)。(2)因為違背上帝ê命令,而被關進監牢中受苦ê人(第10到16節)。(3)因為犯罪被懲罰,甚至致使重病ê人(第17到22節)。(4)tī航海中tú-tio̍h災難ê人(第23到32節)。因為上帝垂聽in ê祈禱,in請大家kah in同齊感謝上帝ê慈愛,頌讚上帝行大能奇事(第8節、第15節、第21節、第31節等等);三是第33到43節,描述上帝ê恩典kah慈愛。

Chit首詩篇ê特色,就是tī第二個段落中,每一個部分結束,就有一段副歌,而副歌ê開始lóng是「tī急難中,in求告上主」,然後用「in tio̍h感謝上主ê慈愛」結束(參考第6到8節、第13到15節、第19到21節、第28到31節)。

第1到3節,chit段是chit首詩篇ê開場序言,呼籲所有ê人lóng tio̍h來歌頌、o-ló上帝,因為上帝有永遠ê「慈愛」。Tùi第3節隱約thang看tio̍h chit首詩歌是以色列人民tùi奴隸之地巴比倫被釋放tńg來後寫做ê,詩人呼籲所有ê以色列人民beh來感謝上帝ê恩典,因為祂拯救受難ê子民。

第4到9節,chit段詩歌是teh描述以色列人民tī曠野漂流ê情景。曠野,是一個不毛之地,無任何食物kah水。因為án-ne,in經歷無水kah食物ê苦難,tùi án-ne求告上帝ê幫助。就án-ne上帝帶領in行到有水lim ê所在,mā幫助in chhōe-tio̍h食物,hō͘ in免去飢渴ê苦難。Ná親像頭前所提過,第6到8節是副歌。因為是tī曠野,所有結尾ê第9節講上帝垂聽in ê祈禱,hō͘ in解除了飢渴ê苦難。

第10到16節,tùi第11節thang看出chit段詩歌真可能kah以色列人民被掠到巴比倫做奴隸,過ná親像牢獄之災ê痛苦生活有關。M̄-koh mā可能是因為犯信仰上ê錯誤,致使災難臨身而陷入囹圄ê苦難。第13到15節是副歌,因為án-ne第16節講上帝ê拯救,是kā ná親像監牢ê「銅門」、「鐵閂」hō͘ phut斷、擊破,hō͘這受難者thang脫離,得tio̍h釋放。

第17到22節,chit段詩歌是談及破病所帶來ê性命苦難。舊約聖經時代有一個普遍ê看法,認為破病是kah犯罪有密切關係,是上帝伸手打擊悖逆ê子民ê一種方式。因為án-ne,tī破病ê苦難中,走chhōe上帝ê赦免,就等於是teh走chhōe上帝ê醫仝款。

Chia詩人tī破病ê苦難中祈求上帝ê救助。詩人tī chia表示已經病重到接近死亡ê邊緣,食不下任何物件,完全喪失「食慾」,chit時已經m̄是醫生ê能力ē-tàng救tńg來性命,除非有上帝ê醫。Á上帝ê話,就是性命ê來源。因為án-ne,當這苦難者向上帝祈求,上帝就醫伊,hō͘伊ē-tàng康復起來。第19到21節是副歌,然後第22節詩人tī得tio̍h醫了後,tio̍h用詩歌向上帝獻上感謝,講述上帝奇妙ê「作為」。

	第17節ê「得病」,原本希伯來文mā有「成做愚昧」ê意思。用愚昧來看chit段詩歌mā thang明白,因為愚昧所表明ê,就是對上帝認bat無清楚,致使離開上帝。當人離開上帝jú遠,痛苦就會加重。

	第23到32節,chit段詩歌講述航行tī大海中所遇tio̍h ê苦難。以色列文化中有一個傳統,認為大海是邪惡勢力、危害性命力量ê隱藏ê所在。上帝創造之初,就是用祂ê靈運行tī水面上,先穩定了水對性命ê危害,了後開始創造。創世記第七到八章講述上帝用大水消滅所有受造ê萬物。重新另外一個創造。啟示錄第廿一章ê作者,講上帝所創造ê新天新地,無koh再出現大海。

無論是大海á是風,lóng是上帝所創造。當航行者tú-tio̍h大風湧,m̄-nā khiā bē穩,明明是ná親像lim醉酒ê人仝款,東倒西歪,chit時船teh要沉無ê時,所有身上ê才能lóng 無路用,最後只chhun上帝thang óa靠。因為án-ne,只有ē-tàng向上帝祈求,chit時,上帝發出命令,hō͘狂風無koh呼嘯,一切風kah湧lóng聽從上帝ê命令。Án-ne,航行者就bē擔憂船翻了「沉到深淵」中。

第28到31節是副歌,tī苦難中向上帝祈求,上帝必定垂聽。chit-má詩人beh見證tī上帝命令之下風平浪靜,chiah致使航行者thang上岸,並且tī「人民ê大會上宣揚上帝ê偉大」。

第33到38節,這是一段歌頌上帝奇妙作為ê詩歌,表明上帝就是kui個宇宙萬物ê創造者,mā是主宰,一切萬物lóng是出tī祂,mā屬tī祂。因為án-ne,只要上帝發出命令,河水會乾旱,肥ê土地mā會變荒蕪,上帝用chit種方式來對付hiah-ê「邪惡」ê人。M̄-koh相對ê,上帝mā ē-tàng hō͘沙漠變成綠洲,hō͘ khiā起tī chit種地方ê人,無koh擔憂iau餓,in ē-tàng掖種,而且會得tio̍h豐富ê收成。M̄-nā án-ne,上帝會賜福hō͘聽從祂旨意ê子民,hō͘ in充滿tio̍h性命力,ē-tàng chē kiáⁿ chē孫,家畜lóng會增加。其實,chit段詩歌mā ē-sái講是kui個以色列人民歷史ê濃縮版。

第39到42節,chit段講述上帝是一個公義ê主,祂討厭欺壓人ê人,祂一定會出手打擊chit種欺壓人ê人,救出受tio̍h欺負ê人,並且賜福hō͘ chit種軟弱者。上帝用chit種方式來表達祂ê正義。「正直ê人」看tio̍h lóng歡喜,而「邪惡ê人」看見上帝進行公義ê審判ê時,只有ē-tàng「啞口無言」。

第43節,所謂「明智ê人」,意思是teh指認bat上帝ê人,會清楚上帝chit種作為。Mā tùi chia體驗tio̍h上帝ê疼永bē改變。

重新查詢 專卷研經 詩篇系列
錯誤回報,請聯繫