民數記 35章1節 到 35章8節   背景資料  上一筆  下一筆
Chit章主要講tio̍h兩個主題,一是第1到8節,提起進入迦南地後,利未人因為無分配土地,因為án-ne,beh tùi其他族群ê一kóa城鎮kah周圍ê牧場,分hō͘利未人當做營生ê路用。總共有四十八個城市。另外一個主題是tùi第9到34節,講tio̍h有關「庇護城」ê條例。這mā是以色列人民siōng特別ê一項赦免罪犯ê方式。In總共設置六座城,當做庇護ê用途。

Chit段經文就是講tio̍h tùi以色列十二支派中,共計提出四十八個城市當做利未人ê城市,四十八個城市是包括六個庇護城在內mā屬tī in管理。

第1到3節,這是iáu未進入迦南地chìn前,摩西就tī上帝指示下先制訂出來ê規定,ài十二支派進入迦南地了後,tùi所分得ê土地中,「分hō͘利未人一kóa城鎮kah周圍ê草場」,其中草場是hō͘利未人家己放牧牛群kah其他牲畜用ê。

早tī第十八章就已經真清楚說明利未族人是上帝特別揀選出來事奉祭祀禮儀ê族群。因為án-ne,其他支派ê人lóng tio̍h全力hō͘ in支持、關心,用chit種方式回應上帝ê疼。

第4到5節,chit兩節講tio̍h hō͘利未人ê草場面積,是每座城ê四周各有九百公尺呈四方形大。

第6到8節,每一個支派提出四座城,共計四十八座城。然後,tī chit-ê四十八座城中,kā其中ê六座城規劃為「庇護城」,為tio̍h是beh當做hō͘「因過失刣死人ê人thang逃到hia求庇護」ê路用。Á每一個支派所提供ê,mā是根據in所得tio̍h土地ê大細á定。照約書亞記第廿一章ê記載,in有詳細安排toh一kóa人分配tī toh一kóa城,m̄-koh hiah-ê城原本就分配給其他族khiā起。換句話講,並m̄是這四十八個城市lóng只有利未人khiā起,卻是kah其他族ê人混合á居。Á利未族人並無一定tio̍h khiā起tī chit-ê四十八個城中,mā thang選擇其他支族願意提供ê城市khiā起,in thang自由地選擇。

另外,tī約書亞記第二十章7到8節記載這六座城ê名是:基低斯、示劍、亞巴城(就是希伯崙),以上三個是tī約旦河西岸。Tī東岸ê三座城是:比悉、拉末、哥蘭。特別tio̍h注意ê是,chiah-ê庇護城是為hiah-ê非故意犯罪ê人所設立ê,包括hiah-ê寄居tī in中間ê外僑在內。M̄-koh,如果是故意犯罪ê人,則無爽快用。Chit種城市有點á像chit-má ê所謂「看守所」仝款。

重新查詢 專卷研經 民數記系列
錯誤回報,請聯繫