民數記 31章1節 到 31章12節   背景資料  上一筆  下一筆
這是一章常常hông用來質疑基督教聖經,尤其是舊約聖經中真chē疑點ê經文之一,詢問ê題目是:上帝為甚麼ài hit種殘忍,kám講無kā米甸人刣了了bē-sái?Chit-má in戰勝米甸人,mā掠奪了in所有ê財物,而且分配了財物,慈愛ê上帝ná會允准祂ê人民chit種行為?這確實是一個真好ê問題。

Thang án-ne了解:chit章有意說明為甚麼摩西beh派人帶兵攻打米甸?理由是因為巴蘭ê事件,米甸人bat想辦法beh消滅以色列人,in所用ê方式是用cha-bó͘人來引誘cha-po͘人棄sak上帝(第16節),chit點絕對是無法度原諒ê惡行。因為巴蘭設計引誘以色列cha-po͘人棄sak上帝,結果上帝用瘟疫懲罰以色列人民,hit-pái有兩萬四千人死亡(參考民數記廿五:6 —9)。因為án-ne,chit-pái ê戰爭有chit種歷史背景,認為米甸人是陷害以色列人民棄sak上帝ê誘惑者。若無消滅,以後真可能會為以色列人民帶來koh khah大ê災難。

Chit章mā有意思beh說明以後以色列ê軍隊出去相刣,勝利了後帶tńg來ê戰利品怎樣分配,tī-chia建立一個模式。Chit種tùi戰爭中分配所得tio̍h ê戰利品,tī古代是真「正常」ê行為。Chit章記明kā chiah-ê戰利品分做兩部分:一是hō͘人民總數ê二分之一,tī chit-ê部分koh取其中ê五十分之一hō͘利未人,因in不從事戰爭。另外一部分是由參加戰爭ê軍人所得,然後koh tùi軍人所得中the̍h五百分之一hō͘祭司。祭司所得tio̍h ê比利未人少,只有十分之一,真可能是祭司人數比起利未人少得siuⁿ chē。因為祭司只有來自亞倫家族ê kiáⁿ孫chiah是,á利未人則kui個支派,人數koh khah chē。

第1到2節,chia開始就講tio̍h發生tī比珥ê事件(參考民數記第廿五章),米甸cha-bó͘人誘惑以色列人民犯姦淫罪,致使上帝非常忿怒á嚴懲,造成二萬四千人死亡。Chit種欺騙行為一定tio̍h受tio̍h報復性懲罰。因為án-ne,上帝ài摩西tī離開人間chìn前,mā就是往生chìn前完成chit件事。

第3到4節,摩西ài各支族派出一千名ê戰士準備出兵去phah米甸人。

第5到8節,chit段經文講以色列人民tī chit pái戰爭中獲勝,mā同時kā bat想beh陷害以色列人民ê巴蘭刣死。Á chit-pái親自率兵出征ê,是祭司非尼哈。這mā表示祭司詢問上帝ê意見,chiah是戰爭致勝ê主要因素。若無上帝幫助,hō͘ in意見,he是無可能有任何結果。Mā tùi chia凸顯祭司角色ê重要性。

第9到12節,chit段經文講tio̍h phah贏仗ê以色列軍隊確實是擄獲了真chē米甸人ê戰利品。Chiah-ê戰利品包括牲畜、婦女kah兒童,mā包括了in所有ê財物。

重新查詢 專卷研經 民數記系列
錯誤回報,請聯繫