民數記 24章1節 到 24章13節   背景資料  上一筆  下一筆
Chit章主要mā是由兩首詩歌組成(第3到9節、第15到24節)。這兩首詩歌mā是巴蘭ê預言,說明上帝對伊ê子民以色列堅守所立ê約,hō͘以色列人民強盛,征服摩押以及附近ê族群。然後tī第20到25節,連續預言亞瑪力人、基尼人,以及後來ê亞述帝國lóng會滅亡。仝款ê,巴蘭一再重述伊ê職責是:「上主所講ê,我就照án-ne 講(全民版)」(第13 節)

Chit段經文是繼續第廿三章27到30節所記載ê,摩押王巴勒要求巴蘭繼續講對以色列人民詛咒。Á巴蘭iáu-koh照規定ài巴勒排設祭壇,hō͘伊通過獻祭走chhōe上帝ê旨意。

第1到2節,tùi chit兩節thang看出巴蘭前兩pái lóng是先走chhōe上帝hō͘伊預兆,好明白上帝ê旨意。chit-má經過兩pái了後,伊已經知影上帝就是beh賜福hō͘以色列人民,因為án-ne,雖然巴勒王帶伊上比珥山頂,伊iáu是俯視曠野ê以色列人民,就tī chit時,「上帝ê靈支配tio̍h伊」。換句話講,前兩pái伊講,是透過獻祭所得tio̍h ê預兆來講話,chit-pái就m̄是án-ne,是上帝ê靈親自kah伊同在ài伊講話。

第3到9節,這是第一pái上帝ê靈感動巴蘭講。Tī chit段詩歌中強調:

一,上帝是全能者。因為是全能者,一般人ê能力無法度左右祂ê旨意。

二,以色列民族就是上帝揀選ê子民,看起來就是美,而且充滿tio̍h上帝賞賜ê能力。

三,是上帝帶領in出埃及,並且hō͘ in大有能力,所向無敵,ná親像凶猛ê獅子仝款。

第9節ê後半句thang對照創世記第十二章3節,上帝呼召亞伯拉罕出哈蘭ê時所hō͘ in ê應允。Ē-tàng看出耶和華上帝是一個守約ê上帝,祂堅持所立ê約是永遠ê約,永bē改變祂對揀選子民ê疼kah祝福。

第10到11節,chit時摩押王巴勒受氣à,因為連續三pái,巴蘭m̄-nā無詛咒以色列人民,顛倒,lóng是hō͘ in以色列人民祝福。就án-ne伊決定取消本來答應beh hō͘巴蘭ê報酬。

第12到13節,chit兩節mā是回應第廿二章18節。巴蘭真清楚回答巴勒,表示就算有kui個王宮ê財寶hō͘伊,伊mā是一定tio̍h按照上帝ê意思傳達信息。

「我只有ē-tàng講上主ài我講」,chit句話是tùi第廿二到廿四章ê中心主題。表示忠實tī上帝ê人,講上帝ài伊講。Bē因為有任何誘惑力,á是迫害力,就改變上帝ài伊傳達ê信息。


重新查詢 專卷研經 民數記系列
錯誤回報,請聯繫