民數記 23章1節 到 23章12節   背景資料  上一筆  下一筆
Chit章mā是繼續巴蘭ê故事。Ná親像tī第廿二章20 kah 35節記載上帝對巴蘭所講ê:「Chiah-ê 人若來叫你,你就起來kah伊去,總是,我所kā 你講ê,你tio̍h 遵thàn。(全民版)」後來巴蘭見tio̍h摩押國王巴勒ê時,就是án-ne對巴勒講:「上主所講ê,我就照án-ne 講(全民版)」」(第12節)á chit-ê句話就成做第廿三章ê中心信息。

Chit章是用兩首詩歌構成ê,主要內容lóng是teh重述上帝堅守祂對以色列人民所立ê約,beh賜福hō͘以色列人民,hō͘ in ê kiáⁿ孫chē kah ná天頂ê星,海邊ê沙。上帝beh保護雅各ê kiáⁿ孫以色列人民,hō͘以色列chit-ê國家強盛ná親像強悍ê公獅。

巴蘭是hō͘巴勒邀請來詛咒以色列人民ê,chit-má卻一再唱出上帝beh保護以色列人民ê詩歌,這當然致使巴勒不爽快,伊希望巴蘭詛咒以色列人民(第11節), 至少巴蘭若無法度詛咒以色列人民,mā無法度祝福in。M̄-koh,巴蘭真清楚kā巴勒講,伊「只有ē-tàng講上主ài伊講」(第12、26節),這mā是先知siōng基本,mā是siōng重要ê職責(參考列王記上廿二:14)。如果先知不傳達上帝,á是無忠實tī上帝ài伊講,chit種先知就無算是先知。

第1到4節,巴蘭ài摩押王巴勒先建造「七座祭壇」準備作燒化祭ê路用。燒化祭ê用品是「七隻公牛kah七隻公羊」。Chiah-ê「七」,lóng teh表示用siōng好ê方式,只為tio̍h beh得tio̍h上帝ê啟示,á是見tio̍h上帝ê面。
值得注意ê是第3節,巴蘭tī chia對巴勒講,上帝「啟示」伊甚麼,伊就kā伊講甚麼,chit句話kah先知米該雅所講ê仝款。

第5到6節,果然上帝回應了巴蘭獻祭,對伊講話。

第7到10節,tī chit段詩歌中thang清楚看tio̍h,巴蘭並無講出詛咒以色列人民,伊確實kā上帝啟示伊傳達出來,內容是上帝堅守祂對以色列人民ê應允。特別是tī第9節,巴蘭講出以色列民族是上帝特別揀選出來ê族群,kah其他族群有區別。因為án-ne,tī第10節ê下半句並m̄是上帝ê啟示,卻是巴蘭聽上帝啟示伊傳講了後,心中有真深ê感觸,mā希望家己ná親像以色列人民仝款,享有上帝特別ê賜福。

注意第8節,上帝ê奴僕一定tio̍h忠實tī上帝。上帝無ài伊講,伊就無法度講。

重新查詢 專卷研經 民數記系列
錯誤回報,請聯繫