民數記 22章1節 到 22章20節   背景資料  上一筆  下一筆
Tùi chit章開始一直到第三十六章,thang講是民數記ê下篇。主要是teh描寫以色列人民tī約旦河東邊、摩押平原ê境遇,並且準備進入迦南地。第廿二章到廿四章,lóng是記載有關巴蘭ê故事,是非常戲劇化ê一段故事。

第廿二章真有意思ê講tio̍h巴蘭受差遣ê經過。巴蘭是甚麼人?聖經並無詳細說明。伊是一個thang明白上帝旨意ê人,因為án-ne,受tio̍h摩押人kah米甸人首領ê肯定,請伊祝福in ê軍人,thang hō͘ in ē-tàng戰勝以色列人民。其實,作者tī kui個故事中所beh表達ê信息是:真正屬tī上帝ê奴僕,一定tio̍h遵照上帝ê指示講話,á m̄是跟tòe家己ê意思講話。這mā是巴蘭回應摩押王所講ê一句話:「我只有ē-tàng講上帝ài我講。」

Chit段經文講述摩押王巴勒想用o͘-se ê方式,hō͘會曉上帝旨意ê巴蘭講出詛咒以色列人民。上帝用真chē方式beh改變巴蘭kah巴勒之間ê關係。

第1節,chit節講以色列人民並無因為佔領了亞摩利人ê城鎮、土地,就停留落來,in是繼續前進到à摩押平原之地,mā就是約旦河東岸ê所在,tī「耶利哥對岸紮營」。

第2到6節,摩押王巴勒因為驚惶以色列人民tī戰爭上以強悍ê手段對付in,因為án-ne,kah米甸人商量,決定邀請比珥ê kiáⁿ巴蘭來幫忙in。伊派使者去對米甸ê首領講:以色列人民tùi埃及出來,人數真chē,希望ē-tàng同齊去邀請巴蘭來「詛咒」in。巴勒王聽講巴蘭而且知影只要巴蘭「祝福,人民就tio̍h福」;巴蘭「詛咒,in就受拖累」,這表示巴蘭身上有特殊ê能力。

第7到12節,就án-ne巴勒kah米甸人ê首領就án-ne決定,派人帶「占卜ê禮金」去請巴蘭,轉達巴勒kah亞捫人首領ê意思。巴蘭第一個反應是beh請求上帝ê旨意chiah ē-tàng回答。

上帝問巴蘭tī in tau做客ê是甚麼人?其實,上帝án-ne問,已經hō͘巴蘭知影m̄免問上帝旨意了,上帝真清楚chiah-ê事。巴蘭並無講白賊,伊真清楚回答上帝講,chiah-ê講客是beh伊詛咒以色列人民。因為是上帝親自帶領以色列人民來到chit-ê所在,當然bē允准巴蘭去做chit種上帝無歡喜ê事。因為án-ne,上帝阻止巴蘭講詛咒以色列人民。祂清楚表示祂kah以色列人民同在。這表示就算巴蘭發出詛咒,mā是無用。

第13到19節,巴蘭聽上帝,回覆chiah-ê來造訪祈求協助ê亞捫人領袖kah巴勒特使,ài in tńg去。因為上帝m̄准伊做chit種詛咒以色列人民ê事。

巴勒顯然不死心,繼續派人去向巴蘭遊說,並表示hō͘ in koh khah chē ê酬金。M̄-koh巴蘭真清楚,就算kā巴勒王宮所有ê金銀珠寶hō͘伊,mā是無用。因為伊「無法度tī任何大細事頂面違背上主」ê命令。這表示巴勒是一個真忠實tī上帝ê奴僕,無受o͘-se á做出違背上帝旨意ê事。

第20節,上帝ài巴蘭kah chiah-ê人去見摩押王巴勒,m̄-koh一定會照上帝ê命令講話。

重新查詢 專卷研經 民數記系列
錯誤回報,請聯繫