民數記 16章41節 到 16章50節   背景資料  上一筆  下一筆
Chit段經文koh一pái描述以色列人民是真緊to̍h健忘ê民族,chiah tī前一工發生in因為埋怨,甚至挑戰摩西kah亞倫之領導權威ê事,á死去chiah-ni̍h chē人。chit-má in koh埋怨in無好好á保護in,講in害死chiah-ni̍h chē人。In無自我反省ê心,lóng是kā所有一切lóng歸原因tī摩西kah亞倫。

第41到45節,以色列人民一再埋怨摩西kah亞倫,帶領in離開埃及不講,還hō͘ in tī曠野流蕩ê hit段時間裡,一再發生死亡ê事件。M̄-koh in bē記得死亡並m̄是因為摩西kah亞倫bē帶領,卻是因為in對上帝ê信心不足,甚至是懷疑所致,特別是挑戰上帝奴僕ê領導權,án-ne chiah是真正ê問題所在。

「雲彩」,tī摩西五經中一再被用來形容是上帝降臨ê一個記號。chit-má上帝koh一pái透過雲彩顯現祂ê榮光tī聖幕中,上帝聽見以色列人民chit種態度,決定剷除chit種會造成民心大亂ê人民。因為án-ne,ài摩西kah亞倫離開chit群來抗議in ê人。

第46到47節,摩西kah亞倫展現出領導者ê風範,並無因為án-ne就放棄家己ê同胞,摩西趕要緊亞倫kā香爐裡ê灰掖tī人民中間,當做潔淨kah懺悔ê記號,因為伊已經知影上帝講完話了後,隨時就ài beh進行懲罰,á懲罰ê方式,是足以造成極大死亡ê瘟疫疾病。

第48到50節,因為亞倫動作快,無擴大死亡,m̄-koh iáu是死去一萬四千七百人。

Chit章所記載ê chiah-ê事件,siōng主要是teh說明chit群由埃及被摩西、亞倫帶出來ê以色列人民,tī埃及khiā起超過四百年之久,有真長ê一段時間teh過奴隸生活,早已經習慣了奴隸樣式,只知影食、lim,真少想tio̍h自由ê性命尊嚴,以及用堅忍、忠實ê心順服上帝ê旨意。Á上帝為tio̍h beh幫助in建立有尊嚴ê性命,kah純潔ê宗教信仰,hō͘ in知影感恩,學會曉負責,就是透過曠野流蕩ê日子,一步步地矯正in過去錯誤 ê心態,tńg來歸到上帝面前,á所有功課,就是tùi學會曉知影尊敬、聽從上帝所揀選ê奴僕開始做起。

重新查詢 專卷研經 民數記系列
錯誤回報,請聯繫