民數記 15章17節 到 15章32節   背景資料  上一筆  下一筆
Chit段經文主要講tio̍h獻上麥á、餅,特別是對tī獻贖罪祭ê條例有koh khah明確ê解釋。

第17到21節,chia mā是仝款特別提起以色列人民「達tio̍h上主賜hō͘ in ê土地後」,表示當in進入迦南地了後,chiah有ê農作物。享受土地所生產出來ê農作物,這是極大ê福氣。這就類似頭胎生ê家畜、大kiáⁿ仝款。親像「第一塊」用麵粉烤起來ê餅,m̄是chhun落來ê,mā m̄是tī同時做一大堆中選一塊,卻是第一塊烤好ê餅。這teh表示tāi先考慮、想tio̍h ê就是上帝。

因為án-ne,ài kā tāi先收成ê麥á磨成粉製成「第一塊餅」獻hō͘上帝,kah tú收成phah好ê麥á當做特別ê禮物獻hō͘上帝仝款。

第22到26節,chit段經文是tī無意中犯罪,á是無照規矩做tāi-chì,這就需要獻贖罪祭。人是軟弱ê,有時會疏忽,á是不注意á犯錯,特別是hiah-ê寄居tī以色列人民中ê外僑,因為不熟悉以色列人ê律法、典章、律例,á是chiah-ê相關ê祭典禮儀等條例,thang用「贖罪」ê方式獻上規定ê祭品。Chiah-ê獻品包括有燒化祭一定tio̍h準備ê一頭公牛外,iáu koh khah用一隻公山羊作贖罪祭用。當然hiah-ni̍h貴重ê祭品,lóng是kah整體ê行為有關,親像kui個家族、部落等。而且是外僑mā仝款tio̍h遵守chiah-ê規矩。

第27到29節,chia指ê是一個人ê部分,若tī無意中犯罪,就需要獻上一隻一歲大ê母山羊作贖罪祭。

第30到31節,chit兩節特別提起若是有人「故意犯罪」,這就無討論空間,只有「死刑」一條,因為hō͘人認為「犯了侮慢上主ê罪」。明明知影chiah-ê誡命、律法、典章、律例等,lóng是上帝透過摩西頒佈hō͘以色列人民遵守ê,故意去違背,就等於「藐視」上帝仝款嚴重。

以上所有chiah-ê條例對tī以色列人民kah寄居tī in中間ê外僑lóng仝款,無分別。只有chit種方式,chiah ē-tàng hō͘ chiah-ê寄居者無koh被排斥,比較容易被看做是家己人,mā容易增加外僑ê認同感。

重新查詢 專卷研經 民數記系列
錯誤回報,請聯繫