Chit章是記載發生tī摩西厝裡ê事件。原因是摩西ê阿姊美莉安kah摩西ê兄哥亞倫，lóng認為in mā thang像摩西仝款領受上帝直接hō͘ in ê信息。Chit件事引起上帝ê忿怒。

Chit段經文講述美莉安kah亞倫對摩西ê不滿。

第1 kah 2節，事件ê開始，講因為摩西娶「一個古實ê cha-bó͘-gín-á做bó͘」，引發美莉安kah亞倫ê批評。古實，是含ê kiáⁿ孫（參考創世記十：6）。In ê不滿只不過是一個藉口而已，真正原因是tī第2節，因為嫉妒摩西tī以色列人民中ê地位日漸高昇有關。雖然亞倫是有「大祭司」ê高尚位階，m̄-koh tī以色列人民中ê地位，iáu是遠不及摩西ê角色。上帝對摩西ê重視，tùi出埃及記第四章16節，上帝對摩西講chit種話：「亞倫會替你對人民講話，伊會對你準做嘴，你會對伊準做上帝。(全民版)」chit節真清楚，亞倫ê角色其實是tī摩西ê支配之下，ná親像利未人是tī祭司ê指揮之下仝款。

第3節，chit節講出摩西ê為人是「比世間任何一個人lóng謙卑」，連上帝lóng歡喜kah伊面對面講話，ē-tàng得tio̍h án-ne恩典ê人確實無chē。