先知彌迦是「十二小先知」中ê一位，是主前第八世紀ê先知之一，另外iáu有第一時期ê先知以賽亞、何西阿，以及阿摩司等。Chit四位先知通常hông稱做主前第八世紀ê先知。	

	先知ê文獻有一個tio̍h注意ê所在，就是它m̄-nā是歷史ê文獻，而且是kā所有ê讀者講：上帝是歷史ê主，tī每一個時代，上帝lóng有透過祂忠實ê奴僕傳達信息，為tio̍h是beh希望聽tio̍h上帝信息ê人，有機會悔改、認罪，ē-tàng因為án-ne而得tio̍h上帝ê憐憫。

    Ná親像頭前已經提起過ê，先知彌迦m̄-nā對北國以色列傳講上帝ê信息，mā對南國猶大講出上帝teh beh懲罰ê信息。Tùi第5節提起ê對象包括撒馬利亞kah耶路撒冷就thang清楚看出來，因為這兩城市分別代表北國ê以色列kah南國ê猶大，合併起來就是kui個以色列民族。上帝beh懲罰in是因為in「叛離」、「得罪」了上帝。

    第1節，「彌迦」，chit-ê名ê意思是「甚麼人ē-tàng親像耶和華」。換句話講，chit-ê名字已經說明了一個重要ê含意，就是tī先知彌迦ê時代，有人kā家己當做神明看，偶像化了家己，bē記得家己是一個人，人是有限ê，而且是真軟弱ê。Á tī以色列人民中，chit-ê名是真普遍ê，原因就是真chē父母希望用chit種名來提醒人注意：m̄-thang/boài/mài扮演上帝ê角色。

	Koh講，chit節講先知彌迦並m̄是kan-taⁿ對南國猶大傳講上帝ê信息，mā同時對北國以色列傳講起帝ê話。這表示先知彌迦是對以色列民族十二支派傳講起帝ê話語。

    第2節，「主要tùi天庭做證」，聖經作者ài用法庭審案子ê樣式來形容上帝就是控告者，beh控告背叛ê子民ê罪證。Chiah-ê子民乃是以色列ê十二支派，因為tī第5節提起ê對象包括撒馬利亞kah耶路撒冷，這兩城市分別指出北國ê以色列kah南國ê猶大，合併起來就是kui個以色列民族。

    M̄-koh tio̍h注意第2節提起「列國」、「世人」，對象是teh指所有ê世人，卻m̄是單指以色列ê十二支派。

	以色列人民一直認為天頂就ná同地上ê世界一般，天頂mā有法庭teh審理天使tùi地上查訪後ê報告，而上帝就是判官。

	第3到4節，先知彌迦講上帝ē-tàng遊行tī受造ê「群山」萬嶺之間，lóng無困難。甚至chiah-ê高山峻嶺ê群山，tī人ê眼中看起來是非常ê雄偉，高bē-tàng攀，m̄-koh tī上帝ê眼中卻是微乎其微ê存在，上帝ê腳隨時隨地thang踏tī群山之上。

    Chia提起上帝行出「伊ê聖殿」，意思是teh指上帝並m̄是lóng tòa tī一個所在無振動。Chit句話mā提醒以色列人民知影，上帝並m̄是tòa tī耶路撒冷聖殿，mā m̄是tòa tī撒馬利亞敬拜ê場所。上帝會四界去巡視、看、記錄，即使是tī高聳ê山嶺上，上帝mā會行遍四界明察一切。

    第5節，chit節強調上帝ê審判一定會來到，原因是「以色列人叛離上帝」，chia所講ê叛離上帝，就是teh指拜偶像神明。Á帶頭ê人，lóng是統治者，in一定tio̍h負起chit項責任。Chia用「首都撒馬利亞」teh代表北國以色列，「首都耶路撒冷」，teh代表南國猶大。

第6節，「撒馬利亞成做荒野廢墟」，chit件事tī主前721年發生；hit-pái是亞述帝國皇帝撒縵以色五世帶兵攻入撒馬利亞城，連續圍城長到三年之久，後來撒縵以色五世ê kiáⁿ撒珥根二世chiah攻落hit-ê城，並且燒毀hit-ê城，北國以色列就án-ne滅亡，人民受掠並被販賣為奴，chiah-ê資料詳細記載在列王紀下第十七章，mā就是北國以色列最後ê一位國王何細亞執政ê第九年。

第7節，tùi chit節經文中thang看tio̍h當時拜偶像神明ê信仰中，有兩件惹上帝受氣ê行為一再被眾先知提起，其一就是有嚴重ê淫亂行為，娼妓氾濫，因為人民認為若ài有豐富ê收成，就需要有koh khah chē ê性行為。其二是財富到上，mā就是講拜偶像神明，所祈求ê就是beh得豐富ê財物，為tio̍h beh得koh khah chē ê財物，往往出現剝削sàn-chhiah人ê行為。當in被敵人攻擊ê時，in ê偶像神明lóng會hō͘敵人搶奪。

第8到9節，chit兩節是先知彌迦對上帝懲罰北國以色列所做ê回應，m̄-koh mā同時提起類似北國以色列ê災難mā會臨到南國ê猶大（耶路撒冷）。

Koh講，先知彌迦以非常哀痛ê語調，講出伊會因為上帝嚴厲懲罰家己同胞而悲傷，表達心中oh得描述ê痛苦。伊所用ê方式就是beh「赤身光腳，四界遊行」，mā tio̍h「像野狗悲號，像鴕鳥哀鳴」。其實，伊是用chit種方式beh kā以色列人民講，上帝tī懲罰祂ê子民ê時，心中ê痛苦就是án-ne地悲慘、哀悽。因為祂kah以色列人民之間ê關係乃是ná親像「父子」，mā像「夫妻」hit種ê親密。

Chia講撒馬利亞ê情況mā會發生tī猶大ê耶路撒冷，所講「無法度痊癒」，意思是teh指毀滅。耶路撒冷城tī撒馬利亞城毀滅ê 135年後，mā就是tī主前586年被巴比倫帝國所摧毀。

第10到14節，chit段經文提起一連串記錄有關北國以色列以及南國猶大受tio̍h懲罰城市ê名單，chiah-ê城市中有四個已經無法度知影實際位置tī tó位，chit四個城是就是：伯‧亞弗拉；沙斐；掖南；瑪律等。

Chia先知彌迦講出上帝懲罰來到，所有受tio̍h懲治ê城市lóng會變樣，kah過去大無相仝。親像先知彌迦提起「拉吉」，這原本是猶大siōng大城市之一，後來被亞述hō͘佔領。其實拉吉城原本是運輸中心，現在卻變成提供逃走ê中心城市。Mā因為án-ne，致使原本ē-tàng得tio̍h後勤支援作戰ê瓦解à，國家當然就會ná親像第14節所講ê，m̄-nā得bē-tio̍h援助，而且iáu koh khah準備向敵人進貢chiah ē-tàng hō͘戰爭停止落來。

注意第13節所講ê「教唆耶路撒冷犯罪」，這說明了北國以色列悖逆ê行為，確實hō͘南國猶大受tio̍h嚴重ê影醒。Chit點tùi亞哈kah約沙法結為親家，而亞哈一再聽從而且放任伊ê bó͘耶洗碧推動北國以色列「巴力神明化」ê事，mā影響南國猶大對上帝忠實ê信仰。因為in mā「仿效以色列ê罪行」。

第15到16節，chia特別提起「剃光頭」，這是以色列人民表示哀傷艱苦心ê狀態（參考以賽亞書三：24、廿二：12，耶利米書十六：6）。會án-ne哀傷，原因就是家己ê cha-bó͘-gín-á被賣去做奴隸。Chiah-ê會hō͘賣去做奴隸ê，差不多lóng是貴族別人ê子女，當時ê cha-bó͘-gín-á會hō͘賣去當女婢，甚至做妓女ê koh khah chē。