Chit種概述ê經文tī馬太福音第四章23到24節、第八章16節mā出現過。

Chit段話ê背景若參考舊約以賽亞書第廿九章18到19節ê經文，就會清楚馬太福音作者ê用心，伊就是beh hō͘猶太人知影耶穌乃是舊約先知所預言ê彌賽亞。

Tio̍h注意ê是tùi第31節chit句「o-ló以色列ê上帝」，講出耶穌「到加利利湖邊」，並m̄是到猶太人khiā起ê社區，卻是外邦人khiā起ê鄉鎮，tú好反應前一段chit位迦南女子對耶穌有信心ê反應。表示耶穌所行ê神蹟，tī外邦人看起來mā lóng會不由得稱頌上帝ê恩典。