馬太福音 13章1節 到 13章9節   背景資料  上一筆  下一筆
馬太福音第十三章是非常出名ê一章,總共記載耶穌所講ê七個天國譬喻。Mā是馬太福音耶穌言論集ê第二段。Tī chit七個譬喻中有兩個譬喻是經過解釋ê,包括掖種籽ê譬喻,以及掖稗á ê譬喻。

第1到2節,有「一大陣人」來到耶穌腳前,in lóng想beh聽耶穌講天國ê信息,m̄-koh必定mā有人是想beh來走chhōe耶穌ê醫。為tio̍h beh hō͘大家lóng ē-tàng看見伊,伊hō͘群眾khiā-tī岸邊ê草地上,伊搭上船,向(ǹg)岸邊ê群眾傳講上帝國度ê信息。

第3到8節,猶太人ê田是旱田,掖種時通常會kā種籽khǹg tī袋子裡,然後kā袋子khǹg tī驢ê尻川斗兩pêng,tī袋á底ê角頭剪孔,án-ne趕驢上田去掖種ê時,種籽就會跟tòe驢行路搖一下搖一下掖出來,不過,chit種方式掖出來ê種籽bē真規則,時常會ka-la̍uh tī「路邊」,所講ê「路邊」就是類似台灣水田中ê田岸。

第二種是掖tī「淺土ê石頭á地上」,這是kah巴勒斯坦ê地質有關,當地石頭真chē。In平時真少整地撿石頭,tī第七年安息年休耕過了後chiah整地。淺土ê石頭á土地,根真oh深入土地。

第三種是掖tī「刺phè」中,這是teh指草叢ê意思。猶太人平時mā真少有除草ê習慣,chiah-ê草長大就是chia所講ê刺phè。通常mā仝款是tī第七年安息年過了後,beh重新掖種ê時,chiah會進行除草ê農務。因為án-ne,chiah-ê刺phè草叢會影響tio̍h掖tī其蔭下ê種籽成長。

第四種是掖tī「好土」ê種籽,chiah-ê種籽會成長kah非常chán。Siōng koân ē-tàng達tio̍h「一百倍」。M̄-koh好ê土需要排除刺phè、石頭。換句話講,好ê土是需要用時間去整理,mā就是施肥整地。

Tī猶太人觀念中:五á是十ê倍數lóng是真好ê。這是因為in看上帝造人ê時,一隻手有五根chéng頭á,兩隻手有十隻chéng頭á,因為án-ne六十倍、á是三十倍lóng是真好ê收成,á一百倍意思就是代表siōng完美ê狀態。



重新查詢 專卷研經 馬太福音系列
錯誤回報,請聯繫