猶太人一向就是ài看神跡（參考哥林多前書一：22），因為án-ne，雖然耶穌tī迦百農城行了真chē神跡奇事，甚至包括hō͘死人koh活、癩ko病得醫等，m̄-koh in iáu是向耶穌要求看神跡。每pái耶穌行了神跡奇事了後，in lóng會讚賞、驚kah gāng去。M̄-koh發出驚嘆聲了後，心底iáu是m̄相信。Tī第十一章16節，耶穌真感嘆地問講：ài the̍h甚麼譬喻chit-ê世代？伊講伊ê世代對伊傳講ê天國信息並無反應。chit-má伊進一步講，伊ê世代根本就無甚麼神跡thang看，因為人ê心若是對上帝不忠實，即使有神跡hō͘ in看見，mā是枉然，因為in iáu是bē相信。

經學教師kah法利賽人，chit兩種人lóng是當時猶太社會菁英ê領導階層。In來要求耶穌顯現神跡hō͘ in看，並m̄是心存好意，這mā是為甚麼耶穌ê回應是「這時代ê人jōa-ni̍h-á邪惡、jōa-ni̍h-á不忠」ê原因。In是表面上想beh看神跡，內心是想beh chhōe碴好陷害耶穌。

第39節，chia所講ê「不忠」，意思是teh指人ê心中無kā創造ê獨一上帝看做是唯一ê上帝。中文《和合本》用「邪惡淫亂ê世代」，就是teh指tio̍h人ê心中有其它ê上帝ê意思。猶太人tùi祖先傳承落來ê觀念：上帝是以色列民族ê丈夫，in是上帝ê bó͘，是有夫妻之間ê關係（參考以西結書十六：8，耶利米書三十一：32，何西阿書二：19—20，以賽亞書六十二：4—5）。因為án-ne，chia ài beh表達ê意思是：當時猶太人對上帝並m̄是忠實，ná親像bó͘對丈夫無夠忠實仝款。Chiah-ê宗教領袖是表面上看起來虔誠，其實內心並m̄是ná親像外表hit種，只是虛假ê外表而已。

Tī chit段經文內底，耶穌特別指出約拿 ê記事來譬喻，約拿 ê神跡是猶太人人人知ê故事，就是記載人tùi犯罪到悔改。尼尼微城ê人民是外邦人，m̄-koh in聽tio̍h上帝ê信息，就趕緊悔改認罪、歸正了，上帝因為án-ne赦免in。M̄-koh猶太人是上帝ê選民，而且一再親目看見神跡，親耳聽見耶穌傳達天國信息，in卻iáu硬心m̄相信。

「人子也tio̍h在地ê深處三工三暝」，耶穌用chit句話來隱喻伊teh beh受難死tī十字架頂，m̄-koh三工後會koh活。Ná親像約拿被大魚吞入腹肚中三工，結果出來後hō͘外邦ê尼尼微城人因聽信福音來悔改得救。耶穌chit種譬喻已經teh kā chiah-ê宗教領袖講，除非in悔改，若無上帝拯救ê信息，會傳到外邦人中間去。

第42節是用對比ê方式來形容，南方ê女王是teh指示巴女王，伊為tio̍h beh親目見識所羅門王ê智慧，無惜千里跋涉（參考列王紀上十：1—10）來訪問。chit-má有一位比所羅門王koh khah有智慧者出現tī猶太人ê目chiu前，in卻是拒絕注意聽。