馬可福音 8章31節 到 8章38節   背景資料  上一筆  下一筆
馬可福音共計三pái記載耶穌預言家己ê受難、死、koh活。Chia是第一pái,另外兩pái分別tī第九章31節、第十章33到34節。Tī編輯上,作者顯現出非常特別ê技巧,lóng tī預言受難了後,續落來ê記事是門徒teh爭大細,chit種編輯手路必定有作者ê用意。而且三pái ê預言中,共同點lóng是「死後第三工,祂會koh活」。

第32節,作者講耶穌kā chit件受難ê事「講得清清楚楚」,m̄-koh卻發生彼得出手beh阻止耶穌往耶路撒冷去受難。伊「Kā耶穌拉到一邊」,而且以非常認真ê態度beh「苦勸阻止」耶穌。

第33節,耶穌責備彼得chit種舉動是「撒旦」,koh用真嚴厲ài伊「行開」,並且講彼得「所想ê m̄是上帝ê想法,卻是人ê想法」,chit句thang參考以賽亞書第五十五章8到9節,mā thang kā此句對照耶穌tī客西馬尼園ê祈禱,耶穌祈求上帝mài hō͘祂伊lim苦杯,m̄-koh祂願意順服上帝ê旨意(參考馬可福音十四:36)。

第34節到第九章1節,chit段經文講出性命ê選擇:beh跟tòe耶穌,就一定tio̍h有獻出性命ê準備。而且chit種獻身是一種極大ê苦難—棄sak家己,giâ起伊ê十字架來跟tòe耶穌,十字架就是苦難ê記號。M̄-koh ná親像耶穌對彼得所講ê,上帝ê獎賞是hō͘人永恆ê性命,人teh想ê,lóng是目chiu前利益。因為án-ne,耶穌就是人喪失性命á是得tio̍h性命之間重要ê分界線。
第九章1節,「鄭重」一詞,mā thang表示「實實在在」ê意思。Á「上帝ê主權」是teh指上帝ê審判。

值得注意ê是,第九章1節成做接落去第九章2節耶穌kah門徒到山頂去變形像ê連結句,表明舊約聖經所講ê一切,lóng會tī耶穌身上發生。因為án-ne,如果門徒認bat耶穌,in就是世間siōng有福氣ê人。因為tī in尚且活teh ê日子裡,會看見上帝tī耶穌身上顯現koh活ê大能。

重新查詢 專卷研經 馬可福音系列
錯誤回報,請聯繫