馬可福音 8章27節 到 8章30節   背景資料  上一筆  下一筆
Tùi第八章27節開始,是馬可福音書一個真重要ê分段點。

Tùi第一章14節開始到第八章26節,chit段經文lóng是記載耶穌tī加利利工作ê情形;然後,tùi第八章27節開始到第十章52節,記載耶穌kah跟隨者行向耶路撒冷ê途中所發生ê事蹟。因為án-ne,tùi第八章27節開始到第十章52節止,是一個新ê階段,記載耶穌帶門徒以及跟隨者行tī邁向耶路撒冷ê旅途發生之記事。

Chit段經文mā ē-sái講是加利利事工ê總結,耶穌想beh知影門徒對伊ê認bat有jōa-chē。

地點是tī「該撒利亞‧腓立比ê附近庄頭」。Chit-ê城是腓力王為tio̍h beh表示對羅馬皇帝ê尊崇所蓋ê。

耶穌向門徒提出一個真重要ê問題:「一般人講我是甚麼人?」tùi這問題thang看出當時加利利地區ê各庄頭,民間流傳tio̍h真chē關係耶穌ê事。Á chit種看法tī第六章14到15節已經提過一pái。

其實耶穌真tú beh問伊門徒ê是:「lín ?Lín講我是甚麼人?」chit-ê問題mā等於是teh kā門徒講:「別人怎樣講lóng無重要,lín跟tòe我hiah-ni̍h久ê時間,lín對我ê了解又koh是án怎?講看māi,我是甚麼人?」

彼得ê回答可能是伊個人ê意見,m̄-koh mā可能是代表所有門徒回答。伊講:「你是基督。」

第30節,耶穌ài祂ê門徒mài kā祂真正ê身分洩露出去,因為這可能會引起猶太宗教領袖當局出面干涉,á影響tio̍h伊傳上帝國信息ê工作。Koh講,門徒對耶穌是「基督」chit種認bat,並m̄是確實清楚。若無,門徒就bē tī途中對tī甚麼人khah大甚麼人khah小ê事發生爭執,mā bē有猶大出賣耶穌ê行為。




重新查詢 專卷研經 馬可福音系列
錯誤回報,請聯繫