馬可福音 7章1節 到 7章13節   背景資料  上一筆  下一筆
第1節開始就提起有tùi耶路撒冷來ê經學教師kah法利賽人,in tàu陣來見耶穌,這表示耶穌tī加利利所傳上帝國ê信息,kah伊所做ê事,已經引起當時宗教眾領袖ê注意,而且這m̄是第一pái,tī第三章22節mā bat經提過,因為án-ne,這ē-sái講是另外一波tùi權威階層派出來調查ê代表。

第2節,這是引發議論ê問題—耶穌ê門徒有人用「無清氣ê手食飯」,chia強調是「無親像法利賽人hit種先洗手」。Chit句話表示chit種「洗手」ê規矩並m̄是出tī摩西律法,卻是法利賽人附加上去ê。法利賽人加添了真chē傳統風俗變成一定tio̍h遵守ê規矩,結果jú加jú chē,甚至chē到hō͘人感覺窒礙oh行(參考馬太福音廿三:4)。

Siōng早規定tio̍h洗手,是針對祭司ê要求,因為in tio̍h主持獻祭ê禮儀,需要沐浴潔身。M̄-koh,後來卻演變成一般人民tī食物件chìn前tio̍h洗手,表示所食ê物件mā因為手ê清氣,內心mā清氣。

第3到4節,chit兩節是馬可福音作者進一步解釋猶太人chit種洗手kah洗滌器物ê規矩。需要洗滌tùi市場上買tńg來ê物件,是因為in認為市場上ê物件真容易被外邦人ê手摸過á污染,因為án-ne,siōng好經過洗滌潔淨了後chiah用,án-ne chiah會hō͘家己tī生活上ê各方面lóng保持「潔淨」。

第5節,chiah-ê宗教領袖直接指責耶穌無教導祂ê門徒遵守傳統ê風俗,就是m̄-tio̍h,ná親像第二章18節質疑伊無教導門徒禁食仝款。

第6到7節,耶穌引用以賽亞書第廿九章13節,說明耶穌時代ê猶太人宗教領袖,in kah先知以賽亞時代ê以色列人民仝款,lóng是kan-taⁿ求表面,無真實ê內心,意思就是假冒為善。Á koh khah嚴重ê是用家己來代表上帝ê命令,án-ne非常危險mā真無應該。

第8到9節,耶穌強調一定tio̍h kā人ê傳統風俗,kah上帝ê命令作一個明確區隔出來,bē-tàng混淆。

第10到13節,tī chit段經文中,耶穌舉十誡ê第五誡有關「tio̍h孝敬父母」chit條誡命為例,指出chiah-ê宗教領袖m̄-nā嚴重曲解誡命之本意,而且錯誤地teh教導民眾,tú好顯示了in ê貪婪。原因是in認為奉獻hō͘上帝,比奉養父母koh khah重要。其實,一個真正愛上帝ê人,一定會tùi孝敬父母開始做起。M̄-koh in認為上帝比父母重要而且大,因為án-ne,kā應該奉養父母ê錢á是物件,the̍h去獻祭,表示家己敬虔,耶穌認為chit種態度並無正確,講穿了,in是teh逃避作kiáⁿ ê責任。這就是in往往kā家己ê意思加tī摩西律法頂面來解釋,當做是摩西律法ê條文,要求人民mā遵守。


重新查詢 專卷研經 馬可福音系列
錯誤回報,請聯繫