Chit-ê譬喻tùi用「留心聽ah」開始，到結束ê時用「有耳áê，lóng tio̍h聽」，表明上帝國ê信息是需要專心注意聽。因為上帝國ê信息就是beh聽入去chiah有用，無聽入去ê人，ná親像無掖tī好ê土地上ê種籽仝款，一下á就無à。有注意teh聽ê人，自然會有好結果，而且成果會相當豐碩。

耶穌用巴勒斯坦人種作ê方式，來說明掖落去ê種籽有四種無仝ê情形：一是掖tī路邊，二是掖tī淺土ê石頭á地上，三是掖tī刺phè中。Chit三種地方ê種籽lóng bē長大成熟來結出任何果子。只有第四種，掖tī「好ê土裡」，án-ne chiah ē-tàng有好ê收成。所謂「三十倍」、「六十倍」、「一百倍」等，chit三種收成ê倍數lóng teh說明美好ê意思，á一百倍就是滿足到極點。