馬可福音 3章20節 到 3章35節   背景資料  上一筆  下一筆
Chit段經文koh一pái呈現馬可福音特有ê「三明治」編輯法,就是第20到21節有人講耶穌「起siáu」,了續後接第31到35節,講伊ê老母和兄弟姊妹來探望伊。中間插入ê經文是第22到30節,有猶太人領袖認為耶穌是hō͘ 鬼王別西卜附身,chiah會有chit種能力。

第20到21節講群眾「koh聚lóng」來到耶穌ê厝,ná親像第二章2節所講ê仝款。因為án-ne,耶穌kah門徒是連食飯ê時間mā無,這必定kah群眾走chhōe耶穌醫ê工作有關係。In-tau裡ê人聽tio̍h了chit種情形,就tùi拿撒勒來beh苦勸阻止伊。

第22節,chia特別提起有經學教師是tùi耶路撒冷落來ê,這表示耶穌ê事已經震撼了耶路撒冷siōng koân當局(應該是「三和林」議會),一定tio̍h派人來察看耶穌到底是怎樣樣ê一個人。因為án-ne,chiah-ê經學教師是屬tī權威階層ê人,in下了判斷,認為耶穌是óa靠鬼王「別西卜」ê能力chiah有辦法趕鬼。

第23到26節,耶穌反駁chiah-ê代表權威當局ê經學教師之講法。耶穌ê說明中真清楚指出,若是有「鬼王」,án-ne「鬼」ê世界就是有組織系統。若此,鬼王一定會保護伊ê屬下,bē hō͘伊ê屬下受家己人欺負,若無鬧內訌,鬼ê世界就bē安寧。

第27節,這是一句當地流行ê俗語。耶穌用chit句話teh說明祂m̄-nā m̄是靠鬼王趕鬼,卻是kah鬼作戰,chiah有辦法kā鬼趕出去。

第28到30節,耶穌用真重ê語氣講chit-ê話。Chia「實在」,表示非常衷心、誠心ê意思。所謂「褻瀆」表示明明知影,卻故意講出無應該講ê毀謗話語。耶穌講chit種人無可能得tio̍h上帝ê赦免。因為這是一種「永遠ê罪」,意思是teh指該下地獄ê懲罰。

第31到35節,頭前有講過,chit段經文mā thang直連連tī第22節後面。

「甚麼人是我ê老母?甚麼人是我ê兄弟?」這是真震撼人心,雖然tùi人來看,耶穌是屬tī約瑟kah馬利亞ê家庭。M̄-koh耶穌希望用koh khah闊ê心胸看性命ê關係,伊用「凡實行上帝旨意ê人就是我ê兄弟、姊妹,kah老母。」所謂上帝ê旨意,指ê就是上帝對人ê疼。因為有愛ê所在,chiah是上帝ê Kiáⁿ(參考約翰一書四:7—8)。

重新查詢 專卷研經 馬可福音系列
錯誤回報,請聯繫