馬可福音 3章1節 到 3章6節   背景資料  上一筆  下一筆
耶穌tī「安息日」醫病並無第一pái,tī馬可福音第一章21到28節就有記載伊tī安息日到會堂,遇tio̍h一位被污靈附身ê人,耶穌隨時醫好伊,hit件醫ê神跡hō͘大家大開眼目,驚kah gāng去無停(參考馬可福音一:23—28)。然後tī仝一工,伊mā醫了彼得丈姆發燒ê病(參考馬可福音一:29—31)。Ē-sái講是當時lóng無傳出任何反彈ê聲音。

Chit-má仝款tī安息日,mā是耶穌tī會堂醫醫病人ê事件,卻引起法利賽人非常不滿。作者tī第2節用「窺伺」一詞,形容chiah-ê法利賽人ê心態,就是teh當等看耶穌是m̄是敢tī安息日醫人。

第3到4節,耶穌當然知影in ê心思。因為án-ne,伊無馬上ê醫動作,卻是請hit-ê手lian去ê人khiā到眾人面前,然後問大家安息日是m̄是thang「做好事」chit-ê問題。Tio̍h注意ê是耶穌用「做好事iáu是pháiⁿ事?救命iáu是害命?」kā它放做伙提問,用意真明顯,表明無救治chit-ê手lian去ê人,等於是teh殘害伊ê性命,hō͘ chit種人繼續受苦落去,這等於是做pháiⁿ事,á絕對m̄是上帝設立安息日ê用意。

重點是tī第5節,耶穌對chiah-ê人冷漠ê態度感覺「悲傷」。Chia用「in ê心腸剛硬」,這用詞mā是描述早年埃及國王回應上帝要求伊tháu放以色列人民ê態度(參考出埃及記七:13、22、八:15、19),因國王ê心剛硬soah引起上帝ê忿怒。Chia耶穌用命令ê語句,ài chit-ê人「Kā手伸直」,án-ne,病就好起來。

注意第 6節,法利賽人結合希律黨人beh殺害耶穌,chit兩種人tī政治意識上是完全無相仝ê人,卻為tio̍h beh殺害耶穌來結合做伙,chia是第一pái,in第二pái合作是tī馬可福音第十二章13到17節,in聯手設計繳稅hō͘羅馬皇帝ê問題,想beh陷害耶穌。

重新查詢 專卷研經 馬可福音系列
錯誤回報,請聯繫