馬可福音 16章9節 到 16章20節   背景資料  上一筆
第9節,所謂「禮拜日早起」,意思就是teh指安息日ê時間已經過à。基督徒用「禮拜日早起」禮拜,並kā它稱做「主日」,主要是teh記念耶穌koh活ê日子,早期基督徒mā tùi-án-ni kah猶太教徒區隔出來。

Chia講koh活了後ê耶穌,第一個向抹大拉ê馬利亞顯現。伊ē-sái講是siōng有福氣ê一個cha-bó͘人。

第10到11節,抹大拉ê馬利亞去向其他當teh悲傷ê門徒報告耶穌koh活ê消息,m̄-koh得tio̍h ê反應是「m̄相信」。其實,馬可福音作者筆下ê門徒,是信心真小ê一陣。

第12到13節,chit兩節ē-sái講是路加福音第廿四章13到35節ê濃縮版。表示koh活了後ê耶穌,第二pái向兩位門徒顯現。Chit兩位門徒向其他門徒報告耶穌koh活ê事,m̄-koh in iáu-kú m̄信。

第14節,koh活了後ê耶穌,第三pái是向十一位門徒顯現,耶穌責備in是「既欠缺信心koh頑固」,理由是已經有兩pái得tio̍h耶穌koh活ê消息,卻iáu是m̄信。

第15到16節,耶穌koh一pái差派in去「傳福音」,而且範圍是擴大到世界各地去傳。強調信kah m̄信之間有無仝ê審判結果。

第17到18節,chit兩節說明真正相信耶穌koh活ê人,有行神跡奇事ê能力。直到今á日,類似chit兩節所提起ê事繼續teh發生。Mā表示koh活ê耶穌,會帶hō͘信ê人有奇特力量。

第19節,chit節講tio̍h耶穌升天。「坐tī上帝ê正pêng」,chit句話表示伊kā進行審判ê工作,擁有天頂極大ê權柄。

第20節,chit節mā回應了第15節所講ê,門徒照耶穌ê命令「四界傳福音」,有koh活ê主kah in同在,藉tio̍h神跡奇事,用來證明所傳ê信息是真正。使徒保羅mā講耶穌藉tio̍h伊所行ê神跡奇事,hō͘人來歸順上帝(參考羅馬書十五:18)。

另外ê第9到10 chit兩節,主要teh說明chiah-ê婦女確實有向「彼得kah伊ê朋友」報告耶穌koh活ê事。而且後來耶穌mā親自向門徒顯現,並且「差遣祂ê門徒」四界去傳佈「hit-ê神聖、不朽、hō͘人得tio̍h永恆拯救ê信息」,這就是福音。

重新查詢 專卷研經 馬可福音系列
錯誤回報,請聯繫