Tùi第十一章27節開始到十二章44節，猶太人領袖接連用四個經過設計ê問題來質問耶穌，主要目的lóng是想beh掠耶穌ê把柄，好殺害伊。

Chit段經文提起tī潔淨聖殿ê事件後，第一個反映出來ê就是猶太人siōng koân議會ê代表「三和林」（Sanhedrin）成員──祭司長、經學教師、長老等，in來見耶穌，問伊「憑甚麼權柄做chiah-ê事」。Chia無指明是甚麼事，m̄-koh可能kah耶穌潔淨聖殿ê行動有關。因為聖殿ê主管單位是祭司團，因為án-ne，in chit-ê問題可能就是teh指耶穌已經僭jú了祭司團ê權責。

耶穌並無正面回答in ê問題，卻是提出另外一個問題反問in，這問題是ài in講看行洗禮約翰ê權柄tùi tó位來？是tùi上帝？iáu是tùi人來ê？In m̄敢回答，因為in知影民眾lóng相信行洗禮約翰ê權柄是先知，á先知是上帝ê奴僕，權柄當然tùi上帝來。M̄-koh問題是chiah-ê宗教領袖是m̄相信行洗禮約翰是先知，因為án-ne，in回答耶穌講「m̄知」，為tio̍h án-ne，耶穌mā不回答in問ê問題。