瑪拉基書 2章10節 到 2章17節   背景資料  上一筆  下一筆
先知瑪拉基用「夫妻」ê關係來形容上帝kah以色列人民之間ê關係,chit種關係就是建構tī「約」chit-ê基礎上。先知以賽亞、耶利米、以西結、何西阿等lóng有用夫妻ê關係,描述上帝kah以色列人民之間約ê重要性(參考以賽亞書五十四:5、六十二:4—5,耶利米書三:1,耶利米書三:20、三十一:32,以西結書十六:8,何西阿書二:19—20)。詩篇ê詩人甚至講出先知以西結信息中所提起ê,若m̄是上帝收留以色列人民,in早就被父母遺棄來死了(參考詩篇廿七:10)。

第10到11節,chia先知瑪拉基連續提出四個問題,chit四個問題ê主要內容lóng是kah「約」有密切關係。Tùi聖經thang看tio̍h上帝kah祂ê子民之間ê關係,除了「夫妻」之外,mā有另外一種關係,就是「父子」關係(參考以賽亞書六十三:16)。

先知瑪拉基提出四個疑問句,其一是:「咱kám m̄是有仝一個老父?」其二是:「Kám m̄是仝一位上帝造咱?」真清楚,這兩句話已經說明tī以色列人民之間有分裂,而且分裂ê問題顯然不輕。這兩句話lóng teh強調一個基本觀念:只要是用色列人民,就是仝一個「老父」,只要是用色列人民,lóng是仝一個位上帝所創造ê。換句話講,大家lóng是屬tī創造ê上帝,祂就是用色列人民ê老父。其三是:「為甚麼咱彼此之間無守信用?」其四是:「為甚麼咱藐視上帝kah咱祖先所立ê約?」先知瑪拉基提出兩件事實來證明伊所講ê,一是「玷污上主所疼ê聖殿」。二是「娶拜異族神明ê cha-bó͘人」。其實,chit兩件事thang當做是一件,因為「玷污」,是teh指以色列人民kā hiah-ê m̄-bat上帝ê cha-bó͘-gín-á娶過門來做bó͘,然後koh跟tòe in用敬拜偶像神明ê方式去敬拜上帝,這就是先知瑪拉基所指出ê「玷污」了上帝所疼ê聖殿ê意思。

第12節,可能就是chit節經文影響tio̍h以斯拉kah尼希米ê決定。先知瑪拉基tī祈禱中,祈求上帝kā chiah-ê因為kah外邦cha-bó͘-gín-á結婚,致使棄sak上帝旨意ê人「tùi以色列中刪除做chit款tāi-chì ê人,hō͘ in永遠bē-tàng參與向上主—萬軍ê統帥獻祭」。Chit種講法ná親像摩西律法中提起上帝ê警告ê時,一再強調違背律法規定者,beh tùi以色列名單中「除名」仝款(參考出埃及記十二:15、19、三十:33、38,利未記十七:3、6,民數記九:13)。

第13節,先知瑪拉基tī chia提起有人tī上帝ê祭壇邊「悲哀、啼哭」得非常悲慘。會tī祭壇邊悲哀、啼哭ê只有祭司,因為ná親像第一章9節所講ê,in已經知影上帝無koh垂聽in ê祈禱。Án-ne,in ê獻祭上帝mā bē接納。二是hiah-ê被丈夫遺棄ê婦女,當hiah-ê遺棄bó͘ ê眾丈夫帶獻祭ê物件到祭壇頂來ê時,雖然是獻祭了,m̄-koh in bó͘啼哭ê聲音,已經贏過in獻祭ê時ê歌頌聲音。先知瑪拉基講in chit種獻祭bē得tio̍h上帝ê賜福。因為上帝kan-taⁿ會垂聽被迫害者ê哭聲,m̄-koh bē接納迫害別人者ê o-ló歌聲。

第14節,先知瑪拉基指出上帝拒絕接受chiah-ê獻祭ê因,就是in「棄sak少年ê時所娶ê bó͘」。先知瑪拉基特別強調chiah-ê婚姻lóng是「tī上帝面前誓約」過ê,bē-tàng隨便棄sak、毀約。因為棄sak、毀約等於是teh否定上帝ê神聖仝款,mā等於teh侮辱、藐視上帝頒佈ê誡命、律法。其實,chia mā是teh隱喻以色列人民已經棄sak了in祖先kah上帝之間ê婚約關係。

第15節,chit節thang參考創世記第二章24節,夫妻是一體ê,bē-tàng分開。先知瑪拉基講婚姻ê關係一定會「謹慎,bē-tàng棄sak家己ê bó͘」。
第16節,先知瑪拉基tī chit節用koh khah嚴肅ê口語警告所有ê以色列人民,講上帝「恨惡休妻」,「討厭」有人做出「休妻」chit種「殘忍ê事」。

古代以色列人民,決定beh娶一個婦女做bó͘ ê時chūn,就the̍h出一件棉袍放tī chiah-ê cha-bó͘人ê身上,表示願意照顧伊,á是娶伊ê意思。所以做一個cha-po͘人用伊ê棉袍khǹg tī另外一個cha-bó͘人ê身上,原來ê bó͘就已經受tio̍h殘酷ê傷害à。Chit種傷害常常是tī棉袍ê遮蓋之下hō͘人疏忽。Mā因為án-ne,以色列人民流行一句話:「棉袍下腳ê目屎。」意思就是丈夫kā原本beh包tiâu bó͘ ê棉袍,the̍h去蓋tī另外一個cha-bó͘人ê身上,這就是先知瑪拉基tī chia傳出上帝ê話所講ê,有人對bó͘做出殘忍ê事,hō͘受傷bó͘ ê目屎被棉袍蓋tòa看bē-tio̍h。M̄-koh m̄-thang bē記得,上帝會看見人tī暗中所做ê一切事(參考馬太福音六:4、6、18)。

第17節,先知瑪拉基講以色列人民ê「談話hō͘上主厭煩」,原因可能kah第一章13節所提起ê,就是in對獻祭ê繁文縟節感覺不耐,mā因為án-ne,就潦潦草草地隨便辦理一下獻祭ê禮儀,á是一面參與敬拜ê行列,一面koh雜念地講獻祭是真麻煩ê事。所以先知瑪拉基就清楚指出,上帝對chit種子民mā仝款會感覺厭煩。Koh講,in故意扭曲上帝ê公義,soah koh講「公平ê上帝tī tó位neh」chit種話,是帶有諷刺、自高ê語氣。

重新查詢 專卷研經 瑪拉基書系列
錯誤回報,請聯繫