利未記 8章1節 到 8章13節   背景資料  上一筆  下一筆
Tùi第八章開始,一直到第十章,lóng是有關祭司方面ê條例,tī第十章1到7節特別記載亞倫ê kiáⁿ拿答kah亞比戶,因為違背祭司獻祭ê條例,á tī聖幕中被火燒死,用chit種實例來警告所有祭司一定tio̍h嚴格遵守獻祭ê禮儀規定。

Chit章是記載有關設立亞倫kah伊ê kiáⁿ孫成做祭司ê kui個程序。有kóa學者認為比較像出埃及記第四十章ê延續,因為tī出埃及記第四十章是完成聖幕ê製造,續落來就是設立祭司ê規律,án-ne chiah算完整。不過tī出埃及記第廿九章已經有記載亞倫kah伊ê kiáⁿ孫是祭司,並且mā記載án怎設立祭司ê條例。

Tio̍h注意ê是,設立祭司ê時chūn,全體以色列人lóng一定tio̍h集合tī聖幕門口,由摩西當眾宣佈設立祭司ê大事。這就真親像當今教會teh設立牧師仝款,全體會友lóng一定tio̍h參加。Koh講,chit章經文規定祭司一定tio̍h潔淨ê規矩,然後chiah是進行獻祭儀式。這表明:祭司一定tio̍h先潔淨家己了後,chiah ē-tàng執行獻祭ê工作。因為只有潔淨ê雙手、腳、身軀(第1到13節),chiah ē-tàng避免污穢了原本已經潔淨ê祭物(第14到36節)。Á kui個設立ê時間是「七」天(第33節),這表示祭司ê職分是神聖ê,因為祭司ê工作是為tio̍h以色列人kah上帝之間ê密切關係。

Chit章講只有亞倫kah伊ê kiáⁿ孫chiah是屬tī祭司ê傳承者,m̄-koh後來申命記則擴大了範圍,認為只要是利未支派ê族人lóng thang成做祭司(參考申命記十八:1─5)。祭司ê主要工作,除了幫助獻祭ê事務外,「因為祭司ê 嘴唇tio̍h 存智識, 人tio̍h tùi 伊ê 嘴請教律法,因為伊是萬軍ê 上主ê 使者。(全民版)」(瑪拉基書二:7)

Chit章因為lóng是講祭司ê事,因為án-ne,lóng會重複一句話:「這一切lóng遵照上主ê命令做。」(八:9、13、17、29、34、36)這表示祭司ê規律就是beh遵照上帝ê旨意,若無,就是teh侮辱上帝。

Chit段經文是設立祭司ê規定。

第1到5節,「亞倫kah伊ê kiáⁿ」,這表示後來ê利未族人中,thang被推舉出來當祭司ê人。設立ê方式,就是帶祭司到上帝ê聖幕前,然後召集所有以色列人到聖幕前聚會,表示這是全體以色列人ê大事。被設立ê祭司tio̍h帶所beh穿ê「聖服」,按立用ê「聖油、一頭贖罪祭ê小公牛、兩隻公綿羊,kah一籃無酵餅」。

第6到9節,被按立為祭司者,一定tio̍h先「沐浴」,表示潔身。Tī chit段經文中記載祭司應該穿ê衫褲、帽á、配件等等。特別tio̍h注意ê是胸牌中有「烏陵」kah「土明」,這兩項物件是用來測知上帝ê旨意之聖物。M̄-koh已經無法度明白是怎樣ê物件。Tùi第9節thang看出亞倫被設立為「大祭司」,因為伊帶tio̍h聖冠,kah伊ê kiáⁿ孫戴tio̍h帽á有區別。Iáu有,只有伊身上是帶tio̍h胸牌,á這胸牌上鑲tio̍h十二塊寶石,每一塊頂面刻tio̍h雅各一個kiáⁿ ê名,teh代表以色列十二支派(參考出埃及記廿八:15─30)。

第10到13節,設立祭司ê時,需要the̍h聖油抹聖幕內面所有ê器物,然後kā聖油倒tī祭司ê頭殼頂,照出埃及記第三十章30節,亞倫ê kiáⁿ mā需要用聖油膏tī頭殼頂。Chit種動作teh表明分別為聖。


重新查詢 專卷研經 利未記系列
錯誤回報,請聯繫