Chit章是記載第三種祭，mā就是「平安祭」ê條例。平安祭，kah燒化祭真類似，用牛（第1到5節）á是用「羊」（第6到16節），siōng大ê差別：燒化祭是全部tio̍h燒獻，á平安祭只有kā祭牲ê一部分tī祭壇上燒獻。

Chit種平安祭mā thang講是一個人祭。有兩種內涵，一是表示感恩，二表示還願（參考民數記六：14）。雖然是一個人祭，若一個民族á是團體beh向上帝感恩ê時chūn mā thang獻chit種祭。親像：五旬節ê時chūn，祭司tio̍h代表人民獻「贖罪祭」作平安祭（參考廿三：19）。燒化祭有一個特別ê所在，就是燒掉祭牲ê脂肪kah內臟，肉留落來hō͘獻祭者kah祭司食用。Kah獻燒化祭仝款，選用祭牲禮一定tio̍h是無殘缺ê chiah thang。

Chit段經文是關係獻牛作平安祭ê規例。

第1到2節，無論是獻甚麼牲祭，lóng有一個共同基本要件，就是「一定tio̍h選用無殘缺ê」牲畜，用公牛á是母牛lóng thang。M̄-koh燒化祭只有ē-tàng用公牛。仝款ê，祭司tio̍h kā手hē tī牛頭殼頂，然後kā牛ê血hiù tī祭壇ê四周。

第3到4節，chia指出牛ê內臟器官siōng好ê部分tio̍h燒獻hō͘上帝。會獻內臟ê原因，可能是kah以色列人民ê觀念有關，in認為人會有感情，是因為有內臟器官ê關係。Chiah-ê獻hō͘上帝ê牲祭，就是beh完全燒獻，任何人lóng bē-tàng食燒獻hō͘上帝之物，若無，會有真嚴重ê懲罰（參考七：25）。

第5節，強調上帝歡喜chit種祭，原因是平安祭teh表示感恩，kah上帝和好ê意思。