利未記 27章1節 到 27章13節   背景資料  上一筆  下一筆
Chit章thang講是附加上去ê,thang kā它看做是附錄,m̄-koh mā thang看做是第六到七章ê一部分。Tī chit章中thang看tio̍h二個主要ê內容:一是關係還願ê條例(第1到29節),二是關係「十分之一」奉獻ê規定(第30到34節)。

Chit段經文真清楚說明下願了後一定tio̍h還願,還願ê方式tio̍h獻上感恩ê祭,若是下願ê對象m̄是事物卻是人,chit時chūn就需要審慎處理。因為若是下願ê對象是人,這就需要另外一種方式來還願,表示kā chit-ê人用「仝款ê代價」贖回。親像tī士師記第十一章記載,耶弗伊hō͘ 上帝揀選出來當士師,伊向上帝下願講:「祢若kā 亞捫人交tī 我ê 手中,hō͘ 我 tùi 亞捫人 hia 平安 tńg 來 ê 時,見若tùi 我ê 厝ê 門出來迎接我ê,beh 歸tī 上主,我beh 獻伊做燒祭。」(全民版)」(士師記十一:30—31)結果上帝成(chiâⁿ)實hō͘耶弗伊帶領以色列人民phah贏了亞捫人。

M̄-koh當耶弗伊tńg到厝裡ê時,第一個出來迎接伊ê,卻是伊ê cha-bó͘-kiáⁿ,這致使耶弗伊悲傷beh絕(參考士師記十一:34—35),m̄-koh伊cha-bó͘-kiáⁿ堅持beh照所chiù ê chōa遵行。因為án-ne,有一種講法,認為chit段經文ê規定,真可能就是「耶弗伊ê條款」,表示下願ê對象是人,就ē-tàng用一種計價ê方式代替。

第3到7節,chia一開始就用「聖所」一詞,表示chit章所訂出ê條例,是比較晚期ê,這mā符合了頭前所講ê,chit章是後來加添上去ê。

Chia分做幾個無仝層級算出對人贖回ê價碼,m̄-nā有男性,mā有女性。Chia ê銀á是用重量計算ê。這有幾個原因,一是hō͘民眾知影,bē-tàng隨便下願。亂下願,到時,就beh ná親像繳「罰款」仝款,代價koh khah高。二是有kóa學者認為是因為聖殿ê經費短絀,這mā當做另外一種補足ê方式。M̄-koh chit種講法不時受tio̍h質疑。不過,基本上thang接受chit種方式hō͘人約束家己不隨便向上帝下願。

第8節,這是針對sàn-chhiah ê人,因為無法度還願ê時,就需要chhōa in去見祭司,祭司tio̍h評估伊ê家庭經濟狀況做出還願ê方式。

第9到13節,chit段是關係物件方面ê條例。下願講甚麼牲畜,就是甚麼牲畜,無法度替換、取代。M̄-koh若是下願ê動物是無清氣ê,就bē-tàng當做牲祭獻hō͘上帝,chit時chūn,就一定tio̍h kā動物帶去hō͘祭司檢驗核價,然後用估定ê原價koh加上審核出來價錢ê五分之一為總價。

重新查詢 專卷研經 利未記系列
錯誤回報,請聯繫