利未記 14章1節 到 14章32節   背景資料  上一筆  下一筆
Chit章一開始就講tio̍h癩ko病被當時ê人認為是一種會傳染ê疾病,因為án-ne,一定tio̍h先kā病患隔離出來。甚至祭司mā bē-tàng tī社區裡檢驗,一定tio̍h城外檢查。

Chia就牽涉tio̍h一個問題,如果癩ko真正無藥物thang治,ná怎樣可能會得tio̍h醫(如果無tú-tio̍h像耶穌hit種有行神跡能力者出現)?咱thang án-ne瞭解:因為祭司m̄是醫生,發生「誤診」是常有ê事。因為án-ne,先kā thang疑ê病人隔離起來觀察,過一段時間了後,就比較ē-tàng確定是m̄是癩ko病了,若皮膚lóng恢復正常,就thang認為是「痊癒」,chiah恢復chit種人「潔淨」之身。

Chit段經文是有關癩ko病症好了後,應該有ê處理方式。Chit段經文thang分做兩個部分來看:一是第3到9節,主要ê方式是用血kah水,表示人ê罪已經被洗淨並贖回。二是第10到32節,獻上贖罪祭ê禮儀。Tī祭司ê看法裡,像癩koán-ne嚴重ê病症,m̄是一般禮儀就ē-tàng得tio̍h平衡,因為án-ne,tī潔淨ê禮儀上,除了用「贖罪祭」之外,iáu ài khah上三分之一ê「量」來表示重要性。這是因為古代觀念中認為:疾病是因為犯罪所延伸出來ê懲罰,因為án-ne,獻「贖罪祭」乃是理所當然ê方式,mā是siōng好ê方法。

第1到2節,ná親像第十三章所記載ê,若是有人發見身上皮膚有異樣,就需要帶去hō͘祭司檢驗,看是m̄是癩koê症狀。仝款,若被診斷並m̄是癩ko病,mā需要tńg來到祭司hia去確認chiah thang。

第3到9節,chit段經文真清楚說明所有檢驗ê過程,其中siōng主要ê,就是祭司tio̍h chhōa chit-ê人「到營外檢查」,這mā是一種預防措施,萬一無完全痊癒,thang避免擴大感染。Koh講,照第十三章46節ê規定,被判定是癩ko病ê人,原本就需要tòa tī營外。因為án-ne,當chit-ê人發見家己ê病已經好了,伊iáu無法度入城內,需要留tī營外等祭司去檢查,通過了後chiah thang入城去。

除了獻祭ê鳥兩隻外,mā需要香柏木、一條朱紅線、一條牛膝草ê嫩枝。鳥ê血tio̍h hiù tī病人ê身上「七pái」,表示完全潔淨ê意思。然後伊需要kā身上所有ê毛髮lóng剃掉,然後沐浴、洗盪衫褲,tòa tī帳棚外七工。了後koh一pái剃掉身上所有ê毛,然後koh一pái洗盪衫褲、沐浴等,án-ne chiah算完成潔淨禮。

第10到20節,當祭司宣佈chit-ê人已經完全痊癒了後,chit-ê人就一定tio̍h照必要ê禮儀獻上感恩ê祭,除了獻燒化祭ê兩隻小公羊、一隻小母羊外,mā需要獻素祭ê三公斤調kah tio̍h橄欖油ê細麵粉、三分之一公升ê橄欖油。Á潔淨禮中間,非常重要ê一點,就是用橄欖油倒tī he人頭殼頂,並且用獻牲祭ê血抹tī he人ê右耳垂、正手大頭拇、正腳ê大頭拇上,用chit種方式表示潔淨。Á chit-ê禮儀mā就是所講ê潔淨禮。

第21到32節,chit段經文是針對hiah-ê sàn-chhiah人家所規定ê潔淨禮。Kah頭前ê差別,是chia thang用一隻小公羊作贖過祭to̍h ē-sái,koh講細麵粉只需要一公斤。另外是用兩隻粉鳥á是斑鳩取代一隻小公羊、一隻小母羊。其它動作lóng仝款。

其實,就算一隻小公羊,對sàn-chhiah人來講mā是真大ê負擔。M̄-koh ē-tàng被宣佈潔淨是一種性命鎖枷ê解脫,至少chit-ê人thang tńg到厝裡,ná親像被法官宣判無罪獲釋仝款,是性命極大ê喜樂。

重新查詢 專卷研經 利未記系列
錯誤回報,請聯繫