利未記 11章1節 到 11章12節   背景資料  上一筆  下一筆
Tùi第十一章到第十五章,lóng tī說明清氣kah無清氣之間ê區別。

詳細說明二者之間ê差別,為tio̍h是beh教導以色列人遵守,好hō͘家己真正成做「分別為聖」ê民族(參考十一:45)。如果kā第十六章1節「亞倫ê兩個kiáⁿ因向上主獻凡俗ê香火被殺以後」,續接tī第十章了後,讀起來mā真順暢。因為án-ne,有聖經學者認為這五章可能是為tio̍h beh教導人民嚴格遵守潔淨、神聖ê禮儀,免得koh再犯拿答kah亞比戶ê事件á加入ê。若此,mā thang看出當時祭司ê主要工作,就是teh分別潔淨á無ê事,因為chit關係tio̍h人民是m̄是ē-tàng進入聖幕(á是聖殿)敬拜上帝ê資格。Chiah-ê區別所講ê「聖俗、清氣kah無清氣」主要目的,mā是teh對抗外邦人宗教信仰ê侵犯,hō͘以色列人完全tńg來到耶和華上帝ê領域中,真實地敬拜上帝。

Chit章是有關潔淨食物方面ê條例。大概ê區別方式如下:各種外邦人所敬拜ê動物,á是hiah-ê因迷信認為有魔力ê動物,lóng屬tī無清氣ê。肉食ê動物kah鳥類是屬tī無清氣ê。想像中屬tī無清氣ê動物,親像:鰻、鱔魚之類ê,因為款式真親像蛇,mā tī無清氣ê食物之列。

其實,teh看chit章經文ê時chūn,mā tio̍h對照一下馬可福音第七章15節、使徒行傳第十章9到16節、羅馬書第十四章等經文ê教導,整體chiah會比較明白。

Chit段經文是有關平時常見ê動物,以及魚類ê潔淨á無之別。

第1到8節,chia列出家畜動物有腳蹄ê,其腳蹄一定tio̍h是分瓣,iáu有其胃一定tio̍h反芻,án-ne chiah ē-tàng列為潔淨動物á食之,若無,就列入無清氣ê動物,bē-tàng食。

對台灣人歡喜食用ê豬肉tī當時是禁止食用ê,tī chia講豬是屬tī無清氣ê動物bē-sái食,原因是豬無反芻。這可能kah中東地帶bat發生食豬á發生瘟疫,á是可能是因為豬tī中東地帶,常常hông用來獻祭hō͘異教神明ê路用,為tio̍h beh區隔有ê規定。Chit種規定對tī歡喜豬肉ê台灣人並無合適。

第9到12節,chia清楚寫出魚類一定tio̍h是有鰭、鱗ê chiah thang食。M̄-koh今á日ê科技已經hō͘遠洋漁船ē-tàng撈捕各種深海魚類,親像:鮪魚、土魠等,lóng是無鱗ê魚。Iáu有台灣人siōng kah意ê鰻魚、鱔魚等,因為樣式真親像蛇á被列入無清氣ê行列,因為蛇被看做是誘惑者、撒旦、魔鬼。

重新查詢 專卷研經 利未記系列
錯誤回報,請聯繫