士師記 7章1節 到 7章14節   背景資料  上一筆  下一筆
Chit章描述上帝啟示基甸怎樣選帶精銳ê三百個人去攻擊米甸ê軍隊。

Chit段經文是記載基甸照上帝ê指示選出三百個人去攻打米甸ê情形,特別是米甸人kah亞瑪力人、以及曠野hiah-ê部族ê人,人數chē到如草蜢一般。上帝知影基甸心中懍neh,因為三百個人beh對抗hiah-nih-chē ê敵方,實力差大碼,m̄-koh上帝透過敵方講起夢境ê現象,堅定了基甸出兵ê信心。

第1到3節,這是真重要ê一段經文,特別tī第2節,是kui個揀選基甸做領袖之事件ê中心思想。主旨teh說明:真正óa靠上帝ê人,bē認為是家己有能力成就大事,上帝知影人ê心內想ê是甚麼。人看外表,上帝看人ê心內。Teh kā tòe基甸ê人群中,雖然人數眾多,m̄-koh,懍neh ê卻比有勇氣ê人數koh khah-chē。Tī三萬二千人ê中,有兩萬兩千人是懍neh ê,kan-taⁿ有一萬人有勇氣想beh跟tòe基甸去相刣。Chit種情形kah申命記第二十章8節ê記載仝款:「Hiah-ê 官長koh tio̍ h 對人民宣布,講:『啥人驚惶失膽? 伊thang tńg 去in tau,恐驚伊ê 兄弟ê 心會消熔,kah伊ê 心相siâng。』 』(全民版)」

第4到5節,即使有一萬人真心想beh跟tòe基甸,上帝iáu是認為siuⁿ-chē,所以,beh tùi chit-ê萬人中間篩選出真正thang用ê人出來。因為án-ne,上帝beh基甸帶一萬人去lim水,當chiah-ê人去lim水ê時,ài基甸「Kā hiah-ê像狗仝款用嘴舌舐(chīⁿ)水ê kah hiah-ê跪落來lim水ê分開來」。

第6到8節,上帝用chit種方式ài基甸kā其中三百個用手捧水lim ê人選出來,chiah-ê人只有「三百人」,hō͘其餘九千七百人lóng tńg去厝裡。Tùi三萬二千人降到三百人,這之間相差足足有一百倍。聖經作者用chit種方式teh見證一件事:有上帝帶領,人ê氣力就不足道à。人數ê chēá是寡,並無影響上帝ê旨意kah計畫。Án-ne,選出來ê三百人手中就有夠額ê補給品kah號角,後來上帝就用這三百人phah敗米甸等十三萬五千人ê聯軍(參考八:10)。其實,上帝án-ne做iáu有一個重要ê意義,beh hō͘基甸tī以色列人民中成做真正領袖,是上帝親自揀選,是上帝ê氣力tī基甸ê身上顯現。

第9到12節,tī chit段經文中,作者講米甸人、亞瑪力人,以及其他曠野ê部族,「像一陣草蜢hiah-ni̍h chē;in ê駱駝加得tio̍h像海灘上ê沙粒」,雖然形容得有點á過份,m̄-koh kā它kah基甸帶領ê以色列軍隊三百名相比,卻是極大ê對比。這ná親像tī迦密山頂先知以利亞一個人對付四百五十名巴力ê先知仝款(參考列王記上第十八章),m̄是人數ê問題,是上帝奇妙ê作為。上帝真清楚知影基甸心內ê不安,無夠額ê勇氣,tùi伊chìn前一再要求上帝證明確實是揀選伊拯救以色列人民ê tāi-chì就thang看出來。chit-má伊心中iáu是驚惶,上帝知影伊ê軟弱,koh一pái kā伊講怎樣得tio̍h夠額ê信心。有hiah-ni̍h chē以色列人退tńg去,不參與chit pái ê戰役,mā說明chiah-ê人kah基甸本來ê心態是仝款ê。若m̄是上帝一再鼓舞,以色列人民恐驚早就被敵人消滅à。這說明聖經作者ê觀點:上帝揀選ê子民,上帝會tī in siōng軟弱ê時chūn,幫助in生存落去。

第13到14節,上帝鼓舞基甸ê作法,就是hō͘基甸聽tio̍h米甸軍營中有人對話,hō͘基甸知影上帝確實kā米甸等聯軍beh交hō͘基甸。Chit種對話ê方式,是用夢境和解夢來表達,而作夢kah解夢ê人,lóng m̄是以色列人,卻是in ê仇敵。換句話講,上帝m̄-nā是tī以色列人中,啟示祂ê旨意,mā會tī m̄信靠祂ê人中間,啟示祂奇妙ê作為,就親像上帝透過埃及國王ê夢境,hō͘約瑟有機會解夢而tùi囚犯成做埃及宰相仝款(參考創世記四十一:1—46)。

重新查詢 專卷研經 士師記系列
錯誤回報,請聯繫