Tùi chit章開始，士師記作者一一紹介上帝賞賜hō͘以色列人民有士師帶領in，這mā是tùi約書亞了後，進入士師ê時代，然後chiah有先知運動出現。Tī這章經文中，作者先紹介兩位士師，一是俄陀聶（第7到11節），二是用笏（第12到31節）。會有士師出現，lóng有一個基本前提，就是以色列人民得罪上帝，去拜偶像神明，上帝受氣，允准外族人來欺負in，in chiah Tī痛苦中祈求上帝憐憫赦免。就án-ne上帝差派士師去帶領in抵抗外族侵略。Chit種情況重複出現，mā說明以色列人民對上帝ê忠實度非常低，這mā反映出每一個時代ê信徒mā差不多是án-ne，值得反省。

Chit段經文真清楚記載tī迦南地裡，約書亞kah以色列人民並無kā迦南人全部消滅，而且留落來bē少迦南地ê原住民，chiah-ê原住民留落來，mā提供了幾則重要ê伏筆：一是以色列人民結局ná親像上帝對摩西所講ê，in會背叛上帝，去拜偶像神明（參考申命記三十一：16—18、三十二：5—6、15—18）。二是hō͘以色列人民有機會繼續學習戰事。

第1到2節，chit兩節說明tī迦南地iáu留落來真chē原住民，上帝用chit種方式訓練以色列人民ê新生代學會曉戰事。因為以色列人民是小國，四面lóng是強猛ê國家，學會曉戰事mā是一種生存之道。M̄-koh teh發展軍事ê同時，一定tio̍h謹記一件事：一個國家、民族，á是一個人ê生存，是beh óa靠上帝，án-ne chiah是性命ê生存之道（參考詩篇三十三：16—19）。

第3節、第5節，chit兩節lóng記落來了留tī迦南地ê族群，有非利士人ê五個城市，包括有：亞實突、亞實基倫、迦薩、迦特，kah以革倫等。另外在迦南地iáu有：迦南人、赫人、亞摩利人、比利洗人、希未人，kah耶布斯人等。

第4節、第6節，chit兩節提起上帝hō͘ chiah-ê民族留tī迦南地，一直成做以色列人民警惕ê對象，主要是希望以色列人民ē-tàng對上帝忠實，ná親像in ê祖先順服上帝仝款。可惜ê是後來以色列人民是kah chiah-ê人通婚，拜in ê神明。