士師記 19章1節 到 19章15節   背景資料  上一筆  下一筆
第十九到廿一這三章,lóng是teh描述一個利未人ê細姨被便雅憫支派ê人輪姦到死ê慘絕人寰事件。為tio̍h chit-ê tāi-chì,以色列其他支派決定聯盟出兵討伐便雅憫支派,而且差一點á就kā便雅憫支派滅族,後來為tio̍h beh挽救該支族免tī滅族,iáu想辦法kā雅比人ê處女hō͘便雅憫族ê cha-po͘人做bó͘,chiah-ê行踏lóng tī說明以色列人民已經是墮落到à極點。Á這事件kah頭前兩章敘述米迦tī厝內設立神壇並且有利未人擔任祭司,kah 但族人kā米迦厝裡ê偶像當做神明供奉,而且iáu由摩西ê kiáⁿ孫擔任祭司等等行為,lóng tī說明以色列人民m̄-nā棄sak上帝甚遠,mā會失去社會秩序。這lóng kah棄sak上帝有密切關係。

Chit段經文先紹介有一個利未人kah伊ê細姨之間ê背景。

第1節,chia一開始就講「以色列iáu未王ê hit段ê時期」,chit句話tùi第十七章就開始一再重複出現,表明以色列人民ê社會生活已經會失去規律,原因是in心中根本to̍h無上帝。

續落來開始紹介講有一個khiā起tī以法蓮山區ê利未人,這kah第十七章1節紹介ê米迦是仝款ê所在。伊娶一個tòa tī伯利恆ê cha-bó͘-gín-á作細姨,tú好mā是米迦厝內ê hit位利未人同鄉,lóng是來自伯利恆。

第2到9節,chit段經文主要teh描述chit-ê利未人所娶ê細姨,m̄知是甚麼原因kah伊ê利未人丈夫冤家而大發脾氣,作者並無說明,只記載伊tī發脾氣了後就家己tńg來後頭厝去。經過四個月後,這利未人去伯利恆勸伊kah伊tńg去以法蓮山區ê khiā家。丈人顯然真努力beh留tiâu chit位利未人ê kiáⁿ婿,因為án-ne,一留koh再留,挽留kúi-nā個暗時,án-ne前後共計留了六個暗時,了後,chiah hō͘伊ê kiáⁿ婿帶tio̍h cha-bó͘-kiáⁿ起身tńg來以法蓮山區去。這丈人án-ne做,真可能是無想beh hō͘伊ê cha-bó͘-kiáⁿ跟tòe kiáⁿ婿tńg去,換句話講,丈人是想beh留tiâu kiáⁿ婿kah cha-bó͘-kiáⁿ,m̄-koh最後,這利未人kiáⁿ婿終其尾得tio̍h細姨ê同意,起身跟tòe伊tńg去以法蓮山區。

第10到15節,因為暗時,奴僕雖bat建議這利未人主人tī耶布斯人ê村落過瞑,m̄-koh這利未人確認為不應該tī外邦人ê村落歇腳,伊寧可去以色列人民ê村落khiā起,真可能認為án-ne比較安全因為當時耶布斯城是由耶布斯人所佔領,hit-ê城直到大衛統治時代chiah攻打落來,改成耶路撒冷城(參考撒母耳記下五:6—9)。因為án-ne,in繼續行到離耶布斯人khiā起ê村落大約有六公里遠ê基比亞chit-ê屬tī便雅憫族人ê村落(參考約書亞記十八:28)。Ē-sái講是奇怪ê,是該村落ê人lóng m̄接待外出ê同胞,這基本上是違背摩西律法講beh好款待外出ê人ê教導,這mā表示基比亞ê便雅憫支族ê人,已經bē記得祖先摩西hō͘ in ê教導,ài in幫助外出者,因為in以前mā bat tī埃及當出外、寄居ê人仝款(參考出埃及記廿二:21、廿三:9,利未記十九:33—34,申命記十六:14、廿六:12),這mā表示in心中已經無上帝,chit點反應了士師記前段部分所一再提起ê:「以色列人行上主所看做pháiⁿ ê tāichì,bē 記得上主—in ê 上帝,去服事chiah-ê 巴力kah 亞斯她錄(全民版)」(士師記三:7)mā因為án-ne不時得罪上帝,去拜偶像神明。Á tī第十七到十八章,則講但族人拜偶像神明,而且iáu指派摩西ê kiáⁿ孫kiáⁿ孫當偶像神明ê祭司。
重新查詢 專卷研經 士師記系列
錯誤回報,請聯繫