士師記 18章1節 到 18章20節   背景資料  上一筆  下一筆
Chit章講出棄sak上帝ê米迦,結果是喪失了所有ê一切。伊原本是希望有這少年ê利未人當in-tau神壇ê祭司後,會tùi上帝hia得tio̍h koh khah chē ê祝福,家業興旺起來,結果tú好倒反。

Koh講,chit章mā為「但」支派得tio̍h城市thang定居做個交帶。

Chit段經文講述但族人iáu teh探察thang安定khiā起ê土地。In派出探á到各地去探察,結果來到à米迦ê厝,並且tùi米迦厝裡這少年ê利未人得tio̍h祝福,果然發見拉億城是一個甚適合khiā起ê所在。因為án-ne,派出六百個武裝部隊準備去攻取拉億城。

第1到2節,chia一開始就講「hit時,以色列無君王」,chit種踏話頭,ná親像頭前第二到十六章中所提起ê「以色列人koh得罪上主」仝款ê意思。Tī第十七章6節記載ê話句koh khah完整,講:「Hit時,以色列中無王,ta̍k 人lóng 照伊家己所看做tio̍h ê 來行。(全民版)」chia mā講「但」支族teh進入迦南地後,原本是有分配到土地ê(參考約書亞記十九:40—46)。Ē-sái講是,in為甚麼會「失去土地」?根據士師記第一章34節ê記載,是因為「但」支族雖然有分配到khiā起ê土地,ē-sái講是in ê土地有亞摩利人tòa tī hia,而且武力甚強,逼kah「但」支族ê人逃到山區去khiā起,無法度落去到平原來。因為án-ne,in想beh另外chhōe thang安定khiā起ê所在。因為án-ne,tùi全族中選出五位勇士去探察土地,就án-ne來到米迦ê厝。

第3到6節,這五個勇士tī米迦ê厝裡聽tio̍h這利未人講話,就馬上聽出伊ê口音,因為án-ne,in經過詢問了後,chiah知影chit位少年ê利未人tī米迦ê厝裡當祭司,tùi án-ne請求這利未人替in求問上帝ê旨意,看in chit pái探察土地ê事是m̄是會成功。Chit位少年ê利未人hō͘ in肯定ê答案。

第7到10節,這五個探á來到一個城市「拉億」,chit-ê城市真可能bat有西頓人來khiā起過,是一個非常好ê土地,m̄-nā肥,而且物產豐富。Koh khah重要ê,是in發見拉億城是一個「和平、安寧,kah世無爭」ê所在,m̄-koh相對ê,mā是一個真封閉ê城市,無kah外界來往,這mā說明兩件事:一是chit-ê城市夠額自hō͘自足。二是tī國防上ê漏洞真大,á是講無想tio̍h需要有國防chit類ê防禦工事。因為án-ne,in 回報建議進攻此城並且佔領hit-ê城。

第11到13節:tī chia ài beh特別注意ê是,tī第7節、第27節ê「安寧」chit-ê詞,kah第10節ê「lóng無防備」lóng仝款ê字根,這表示ê另外一個意思是teh指「信賴」,mā就是hit-ê城ê人民是一個值得信賴ê,相對ê,「但」族ê人決定beh用六百個有武裝ê士兵入去佔領,就是bē-tàng信賴,是「任意而為」,kah拉億城ê居民「kah世無爭」完全顛倒,這tú好反映第1節所講ê「hit時,以色列無君王」chit句話ê意思,就是tī「但」族人ê身上。

第14到20節,m̄-koh支族ê這六百個武裝部隊來到米迦ê厝,ná五個探á就講出in頂pái tī米迦ê厝發見ê事—有一尊木頭偶像,外頭糊tī銀á,iáu有其他偶像kah一件以弗得。因為án-ne,chiah-ê人就決定beh這五個探á入去the̍h走chiah-ê偶像。雖然chit-ê tī米迦厝內ê利未人發見了,m̄-nā無阻止,反tńg因為chiah-ê 但族人ê遊說,伊真歡喜接受in邀請去當但族人ê祭司,卻m̄是只有米迦厝裡ê祭司,就án-ne,但族人m̄-nā偷the̍h米迦厝裡ê偶像,連帶ê mā kā祭司帶走。Chiah-ê行為其實lóng tī說明但族人ê心中無上帝,chiah會án-ne胡作非為。


重新查詢 專卷研經 士師記系列
錯誤回報,請聯繫