士師記 17章1節 到 17章6節   背景資料  上一筆  下一筆
Tùi第十七章到第廿一章,是士師記ê結尾部分。這部分是用兩個故事串連起來,其一是tùi第十七到十八章,敘述tī米迦ê厝裡發生ê故事,其二是tùi第十九章到廿一章,敘述發生tī一個利未人身上慘痛ê事件而引發ê以色列人民內戰──聯合攻打便雅憫族人。雖然是兩個事件,卻有仝一個主題:tī「hit時,以色列無君王」,然後附加一句形容社會景象ê話是「人人tòe家己ê意思做tāi-chì」(參考十七:6、十八:1、十九:1、廿一:25)。比較特別ê是tī chit五章中,都無koh再提起頭前所重視ê「士師」角色人物。然後koh再緊接落去ê撒母耳記就提起以色列人民向先知撒母耳要求膏立國王統治in(參考撒母耳記上八:5、19),chiah-ê充分表示出以色列人民tī迦南地生活了一段時間了後,受tio̍h迦南文化ê影響真深。

Chit段經文講tio̍h有一個人名叫米迦,意思就是「甚麼人親像上帝」?換句話講,無人知影上帝是甚麼款ê。後來米迦ê老母ài人「鑄造」一座上帝ê神像來膜拜,這mā表示in bē記得十誡ê第二誡-bē-tàng為上帝鑄造任何偶像-chit-ê誡命(參考出埃及記二十:4)。這mā說明以色列人民tī信仰上墮落ê情況已經非常嚴重à。

第1到2節,chia紹介tòa tī以法蓮山區ê米迦,伊偷老母ê錢。M̄-koh當伊聽tio̍h老母詛咒偷錢ê人,因為án-ne,非常驚惶,就趕緊招認家己就是ná偷錢ê盜賊。Á米迦ê老母為tio̍h beh「抵銷」家己所發出ê咒言,趕緊改用祝福ê話,講hit筆錢beh奉獻hō͘上帝,希望用chit種方式來消除kiáⁿ米迦可能因為án-ne而帶來ê厄運,因為當時ê人深信人詛咒ê誓言必定會實現。

而有趣味ê是米迦偷老母ê錢是「一千一百塊銀á」,這數目tú好是非利士人o͘-se參孫愛上ê cha-bó͘人黛利拉ê金額,(參考士師記十六:5),in ài伊為tio̍h錢出賣參孫。因為án-ne,chia用「一千一百塊銀á」當做這事件ê開始,kah-ná mā teh隱喻這m̄是一件好事,卻是kah出賣性命有關ê事。

第3到4節,米迦ê老母知影家己kiáⁿ偷錢卻hō͘家己詛咒ê時,趕要緊伊ê kiáⁿ米迦the̍h錢去請師傅鑄造一座木頭偶像,外面用銀á包裹起來,kā chit座木頭偶像放厝裡膜拜。Chit種情形ná親像基甸後來tī家己ê家鄉鑄造一座偶像,致使以色列人民棄sak上帝去膜拜ná偶像(參考八:24—27)。
Chiah-ê lóng tī說明以色列人民確實是真迦南化了,棄sak了上帝jú來jú遙遠。因為連siōng基本mā是siōng重要ê十誡lóng會bē記得,其他關係摩西律法規定ê生活規律就koh khah免講à。

第5到6節,chia講米迦koh替chit座神像穿上「以弗得」,iáu指定家己ê一個kiáⁿ作祭司,換句話講,伊等於tī厝裡開一個神壇仝款,án-ne,hō͘人去伊ê厝膜拜,而且tùi第十八章14節、17節等等koh khah清楚看tio̍h,後來in-tau中ê偶像神明jú來jú chē尊了,可見問題ê嚴重性。士師記作者會tī第6節講大家lóng跟tòe家己ê意念去做tāi-chì,差不多是已經kā上帝bē記得kah chheng-khì-liu-liu了,可見當時以色列人民已經敗壞到極點à。

重新查詢 專卷研經 士師記系列
錯誤回報,請聯繫