士師記 14章1節 到 14章9節   背景資料  上一筆  下一筆
Chit章開始紹介參孫長大,m̄-nā描述參孫有極大ê氣力,ē-tàng刣死獅,而且ē-tàng一個人抵擋三十個非利士人。

Chit段經文講述參孫喜愛一個非利士cha-bó͘-gín-á,拒絕父母ê勸誡,然後koh食了死去獅屍體ê蜂蜜,chiah-ê行為lóng teh表示伊已經違背本來獻hō͘上帝ê離俗人應有ê行為。

第1到4節,chit段經文ê開始就講tio̍h參孫已經長大,而且喜愛上一個非利士cha-bó͘-gín-á,這正講出第十三章1節,hit時以色列人民正受tio̍h非利士人統治,tī痛苦中祈求上帝幫助。因為án-ne,伊喜愛非利士cha-bó͘-gín-á ê事,一定引起父母ê不滿,而這mā講出當時以色列人民tī迦南地已經kah當地人普遍有通婚ê現象,m̄-koh mā因為chit種通婚,致使以色列人民跟tòe當地人民ê宗教信仰而棄sak了上帝。Chit點mā是後來聖經作者一再認為:若是kah m̄信上帝ê人結婚,會hō͘人棄sak上帝,án-ne chiah是hō͘性命受tio̍h苦難ê siōng大因素。M̄-koh第4節chia講參孫決定娶非利士人cha-bó͘-gín-á做bó͘,是出tī上帝ê旨意,為甚麼會是án-ne?這實在是件「奇妙」ê事。上帝往往會用人ê軟弱來完成祂奇妙ê拯救計畫(參考創世記四十五:8;五十:19—20;歷代志下廿五:20;使徒行傳二:23—24)。

第5到6節,chit兩節講出參孫有特別ê氣力ē-tàng單獨一個人刣死一隻獅,伊ê氣力是tùi上帝來ê靈同在。聖經作者beh表明一件事:有上帝ê靈同在ê人,伊ê氣力是無法度估計ê大。其實參孫是tùi伊tī老母ê胎中就已經有上帝ê靈同在了,直到伊成長過程中lóng是án-ne,因為伊是tī上帝旨意下出世ê gín-á。其實,參孫身上有hiah-ni̍h大ê氣力ē-tàng刣死一隻獅,這mā teh回應hit位天使所講ê「奇妙」ê意思。

第7到9節,講參孫食獅屍體內ê蜂蜜,並且kā它hō͘ m̄知情ê父母食。屍體,這是teh指無清氣ê物,依規定「離俗人」是bē-sái食án-ne ê物件。換句話講,參孫已經bē記得家己是「分別為聖」ê人,一定tio̍h tī生活上非常ê頂真。包括伊想娶ê bó͘是異族人,chit-má koh食無清氣ê物件,而這兩件事lóng是tī父母無仝意á是m̄知情之下所做ê,這表示伊所做ê事已經違背本來伊出世就已經獻身hō͘上帝當「離俗人」ê本意à。Á chit件食獅屍體內ê蜂蜜ê tāi-chì,就成做伊棄sak上帝揀選ê一個暗示,這暗示mā說明以色列人民ê實況,不時為tio̍h婚姻棄sak上帝,mā為tio̍h好味而bē記得上帝ê賞賜比hiah-ê食物koh khah豐富。

重新查詢 專卷研經 士師記系列
錯誤回報,請聯繫