猶大書 1章1節 到 1章25節   背景資料
Tùi使徒保羅ê書信開始到猶大書,lóng會看tio̍h早期教會所發生ê嚴重問題,就是有所講ê「假先知」、「假教師」進入教會傳播假ê信息,影響tio̍h真chē信徒棄sak了真理,跟tòe這假使者去à。猶大書mā是為chit-ê問題而寫ê一封書信,特別ê是chit封書信一開始無jōa久,就談及有關chiah-ê假教師「曲解」了上帝「恩典ê信息來掩蓋(khàm)家己腐敗ê行為」。Ná親像使徒保羅寫hō͘加拉太教會ê書信有真類似ê所在,伊Tī該封書信中,用真嚴厲ê詞句責罵hit-ê教會偏離了真理之道(參考加拉太書一:6—9)。原因是有人進入加拉太教會去傳「另外一種福音」,使徒保羅講he是kah in過去傳hō͘ hit-ê教會ê福音無仝。使徒保羅認為福音就是「耶穌基督kah伊死tī十字架上ê事」(參考哥林多前書二:2),chit點就是福音ê中心,mā是siōng重要而且無法度改變ê信息。

第1節,chit節開始作者就講家己是「雅各ê兄弟」。

猶大,chit-ê名tī猶太人中真普遍,因為án-ne,當做者講伊是「雅各ê兄弟」ê時,而這「雅各」真可能就是耶穌基督ê兄弟雅各(參考馬可福音六:3)。這mā就是講chit位猶大mā是耶穌基督ê兄弟之一。Á伊無明確說明家己是耶穌基督ê兄弟ê原因,是早期教會tī耶穌基督koh活升天了後,就無koh以地上血緣關係來看耶穌基督,因為是祂上帝ê kiáⁿ,所有ài耶穌基督做見證ê人,lóng是祂ê「奴僕」,而無koh用牠tī拿撒勒ê家庭之兄弟關係來看家己。

	作者講伊寫chit張phoe是hō͘所有基督徒看ê,因為án-ne並無說明範圍是toh一kóa教會。M̄-koh thang來確定ê是當時基督徒lóng是屬tī猶太人基督徒,因為chit時chūn ê基督教會之重鎮,是tī耶路撒冷,卻m̄是使徒保羅ê外邦地區。

	第2節,mā是一般書信一定有ê請安語。Chia強調「豐豐富富地賜hō͘」,這是teh表示ài tī本來ê chiah-ê恩典之上,koh加添入去,hō͘伊tī「憐憫、平安,kah慈愛」ē-tàng koh khah豐富起來。

    第3到4節,chit封書信原本是beh討論有關耶穌基督ê「救恩問題」,mā就是有關耶穌基督ê死kah koh活之恩典,因為耶穌基督降生到世界上,是為tio̍h beh拯救所有ê世人(參考路加福音二:10,羅馬書一:16)。因為這救恩只tī耶穌基督身上出現,因為án-ne,作者特別強調講「只一pái」,mā就是只有tī耶穌基督內面chiah有ê救恩。M̄-koh因為教會內部有發生嚴重ê事,就是有假教師傳講錯誤ê信息。因為án-ne,作者認為有「馬上」向大家「提出苦勸」ê必要。Chiah-ni̍h緊急是有人kā錯誤ê信息帶入教會中,chiah-ê人「曲解上帝恩典ê信息」,而in「曲解」ê目的是為tio̍h beh「掩蓋(khàm)家己腐敗ê行為」。是teh指有人強調只要信了耶穌基督,上帝ê恩典ē-tàng蓋過所有ê罪過,因為án-ne,無論怎樣ê犯罪,lóng thang hō͘ 上帝ê恩典所接納。因為án-ne,tī生活上就有放縱情慾方面ê行為出現。

第5到7節,作者提出三項kah歷史有關ê事件,包括:一是出埃及ê事件、二是墮落天使ê事件、三是上帝毀滅所多瑪kah蛾摩拉chit兩個城ê事件等。
第一件事是記載tī民數記第十四章,提起上帝帶領以色列出埃及tī曠野漂流期間,因為in對tī beh進入迦南地產生giâu疑,就án-ne上帝決定凡年滿二十歲以上ê人,lóng無法度進入迦南地,lóng會死tī曠野裡(參考民數記十四:26—29)。

第二件事可能kah創世記第六章1到4節所提起ê墮落天使之記事有關。

第二件事kah創世記第十九章有關係,所多瑪kah蛾摩拉chit兩個城市ê人mā是m̄相信上帝,人民生活tī淫亂罪惡中,結果上帝ê懲罰就是毀滅chit兩個城市,毀滅之狀ē-sái講是寸草不留,只有羅得kah伊ê兩個cha-bó͘-kiáⁿ逃離出來而已(創世記十九:30)。

第8節,是繼續teh講述第4節所提起ê「不敬虔ê人」是一個怎樣ê型態;chia指出chit種人就是思想上有「淫穢ê幻想驅使 in犯罪,污損家己ê身軀」,這就是所謂思想ê「淫亂」,是意念上ê行為,mā ē-sái講是對上帝無夠忠實。因為一個對上帝忠實ê人,一定tio̍h是心靈潔淨ê人,因為án-ne chiah ē-tàng面對上帝(參考馬太福音五:8),mā只有án-ne chiah ē-tàng坦然無驚惶地面對上帝ê審判(參考約翰一書二:28、三:21、五:14)。

第9節,kah申命記第三十四章5到6節記載摩西往生,卻無人知影伊埋葬ê所在。早期教會有一本流傳甚廣ê經典名叫「摩西升天記」,tī chit本冊中提起摩西死後,是由「天使長米迦勒」協助埋葬ê,了後無久就升天à。當天使長米迦勒準備ài帶伊升天ê時,卻被「魔鬼」阻擾,因為魔鬼堅持「摩西ê屍體」由伊管理,理由是摩西teh帶領以色列人出埃及入曠野後,刣死了真chē人。Chia作者講為tio̍h搶奪摩西ê屍體,天使長米迦勒非常受氣,ē-sái講是mā無用「侮辱ê話」譴責魔鬼。因為潔淨ê人bē講pháiⁿ話,免得家己mā被pháiⁿ話污穢了心靈。

第10節,kah第9節相對照;如果連天使lóng bē用「侮辱ê話」,chiah-ê不敬虔ê人所表現出來ê,m̄-nā是思想上有淫亂不潔ê念頭,講出來ê話koh khah是lah-sap難聽,甚至連家己「所bē了解ê事」,mā會用lah-sap ê話去解讀。Chit種行為就「像野獸仝款跟tòe本ē-tàng去做hiah-ê毀滅家己ê事」,就是bē用慈悲、憐憫之心看待性命ê尊嚴。

第11節,連續提起三個舊約中非常頂港有名聲下港有出名ê人物,其一是該隱,二是巴蘭,三是可拉。作者tī chia清楚指出chit三個人物所代表ê,就是不敬虔ê人ê特性,有極高ê嫉妒心、對錢財有貪婪ê慾望,kah對權勢有迷惑ê心。

作者tī chia用該隱、巴蘭、可拉等三人做譬喻。該隱因為嫉妒小弟亞伯,就kā家己ê親小弟亞伯刣死(參考創世記四:7);巴蘭則為tio̍h錢財,竟然會違背上帝ê旨意,作無應該做ê事、講無應該講ê話(參考民數記第廿二到廿四章);而可拉ê例thang參考民數記第十六章,清楚記載伊mā是利未族人,卻對摩西kah亞倫ê帶領不滿意,想beh取代in兩人ê地位,故意藐視摩西kah亞倫兩人hō͘ 上帝委任ê權威。

第12節,指出頂面所講chit三種型態ê人竟然出現tī當時教會ê「愛筵」,koh khah pháiⁿ看ê是,in竟然kā愛筵看做是「狂歡」宴樂ê場合。In kan-taⁿ想beh滿足口腹之慾,心靈ná親像lian去ê人仝款。

第13節,真清楚講出chit種人ê行為,是上帝所討厭、bē祝福ê對象,甚至會帶來上帝忿怒ê懲罰。

	第14到15節ê「亞當ê第七代孫以諾」,chit-ê資料thang參考創世記第五章18到24節。以諾,在世間ê日子kah上帝有「密切ê交往」,因為án-ne,tī伊往生ê時,「上帝kā伊接去,伊就phah m̄見去」。

作者tī chia引用第一世紀教會中非常眾信徒所kah意ê以諾冊,Tī該冊ê第一章9節講上帝會kah以諾「帶千萬ê聖天使同齊來」,到這世間來審判所有ê人。Chit種認為天頂ê天使mā thang來審判世間ê人ê觀念,tī猶太人ê觀念中是非常普遍ê,mā自然ê流傳到早期教會中。Á馬太福音第十六章27節記載耶穌基督所講ê話:「人子beh tī in老父ê榮耀中,kah祂 ê天使同齊來臨。Hit時,祂beh按照各人ê行為施報應。」tī chia,猶大書ê作者講上帝會kah以諾帶眾天使來審判chiah-ê「行為不敬虔,koh用不敬虔ê話冒犯上帝」ê人。

	第16節,猶大書作者tī chia指出chiah-ê不敬虔ê人ê行為,就是kan-taⁿ會「埋怨別人,責怪別人,而且in ê行為是「隨從家己邪惡ê慾望,講誇張ê話」,甚至koh khah嚴重ê是會「為tio̍h家己ê利益諂媚別人」。Chia講「為tio̍h家己ê利益諂媚別人」,chit句話真清楚講出chit種人講ê話根本就是講白賊、不誠實ê,就是為tio̍h圖謀家己利益。因為諂媚ê意思,是討人ê歡喜,並m̄是取悅上帝。

第17節,作者tī chia ê意思是beh hō͘讀者知影,耶穌基督ê教示已經透過祂ê門徒傳達出來,因為án-ne,若有人無照耶穌基督ê教導,hit種ê教導就m̄是真實ê。

第18到19節,提起「歷史ê末期」,lóng是會有一kóa人傳講錯誤ê信息,chiah-ê人siōng歡喜講白賊,講kóa不實ê話,而in卻過「邪惡kah敬虔」ê生活。Mā會用引誘而且帶有「慾念」ê話語來「嘲弄」謹守信仰規律ê信徒。Chiah-ê人其實kan-taⁿ會製造教會ê紛爭,tī信仰生活上並無見證thang講。

第20到21節,ē-sái講是作者對眾信徒最後ê勸勉,伊希望眾信徒有三項堅持:

一是堅守神聖ê信仰,並且會藉tio̍h「聖神ê氣力祈禱」。Chit-ê意思就是無私慾ê心kah上帝交往。因為上帝是神聖ê,beh kah上帝交往mā一定tio̍h用聖潔ê心靈kah上帝對話。

二是beh「常常生活tī上帝ê疼裡」。上帝ê疼是聖潔ê,活tī上帝ê疼裡,就是過聖潔ê生活,無法度隨便。

三是「仰望咱ê主耶穌基督」ê憐憫。基督徒siōng大ê榮幸,就是有耶穌基督成做救主,並且因為耶穌基督ê koh活,hō͘所有信靠伊ê人lóng跟tòe享受koh活ê福氣。Chia ê「憐憫」,表示耶穌基督ê救恩。

第22節,tú好kah堅守信仰到底ê人成做對比;chiah-ê tī信心上「憢疑不定ê人」,mā ē-sái講是信心軟弱ê人,有堅定信心ê人會「憐憫」chit種人,因為in對信仰ê認知無夠,chiah會造成信心軟弱、不足,因為án-ne,bē-tàng笑in。

第23節,則解釋了第22節所提起ê tī信仰上憢疑不定者ê款。作者講beh「tùi火中搶救in」,chia ê「火」,這是teh指審判ê意思。有kóa人已經到à面臨嚴重懲罰之審判ê地步了,另外有kóa人則需要用憐憫ê態度來看待in,m̄-koh有時為tio̍h beh憐憫in,就一定tio̍h kah in做伙,陪同in,hō͘ in感受tio̍h真愛ê流露。Ē-sái講是,一定會特別小心(戒懼),一定tio̍h避免家己無法度救人而被感染。作者引用癩ko病患ê衫褲作隱喻,說明若beh避免被癩ko病感染,甚至連衫褲mā tio̍h棄sak。意思就是beh提防,免得被感染了家己卻iáu m̄知。

第24到25節,經文被看做是新約聖經中siōng美ê頌讚詞句,kah使徒保羅所寫ê羅馬書第十六章25到27節,以及以弗所書第三章20到21節真類似。Chia第24節是teh回應第20節ê話,ài信徒有堅定ê信心,持守tio̍h信仰無變,án-ne就會得tio̍h上帝ê保守「bē致使跋倒」,án-ne tī終末審判來臨ê時chiah ē-tàng「歡歡喜喜」ê心tńg來到上帝「榮耀ê面前」。Mā就是約翰書信ê作者所強調ê坦然無驚惶面對上帝審判仝款。

第25節真清楚強調講,上帝乃是「獨一無二ê上帝」,無其他ê神能用來比並創造ê上帝(參考出埃及記二十:23,申命記五:7、三十二:39)。上帝是「藉tio̍h咱ê主耶穌基督拯救咱」,這mā有表示無其他拯救ê途徑。「威嚴」,chit-ê詞只有tī chia出現,表示上帝是偉大ê、而且真神聖有權威ê。

重新查詢 專卷研經 猶大書系列
錯誤回報,請聯繫