Chit段經文是第三到四章ê總結，說明以色列人民只因為上帝行神跡帶領in渡過約旦河達tio̍h西岸，就震撼了當地原住民ê心，hō͘ in膽怯心驚。其實，chiah-ê lóng tī說明只要聽從上帝ê命令做tāi-chì，性命就有保障。

第19節，chia ê「正月初十」，tú好是出埃及記第十二章3節所提起，teh過Pôaⁿ過節前夕宰殺羊羔ê日子。這mā表示是以色列人民離開埃及到進入迦南地，整整四十年時間。In pôaⁿ過約旦河進入迦南地ê第一個所在—吉甲。

第20到24節，koh一pái強調立十二塊石頭做記念碑ê用意，就是beh hō͘後代kiáⁿ孫永遠會記得上帝施行偉大神跡拯救in ê恩典，以及十二支族聯盟連結做伙不分離ê意思，並且用chit種方式教導kiáⁿ孫tio̍h知影敬畏上帝。

第五章1節，當迦南地ê住民一聽tio̍h以色列人民ē-tàng順利行過約旦河，而且tī河水高漲ê時chūn，安然行過，hō͘ in lóng感覺非常ê大tio̍h驚，嚇到「魂不附體」。這mā回應了早年以色列人民驚惶進入迦南地ê心境，甚至bat講上帝帶領in出埃及是錯誤，in會被迦南人殺害等，過去hiah-ê去迦南地窺探ê探á所回報ê 錯誤謠傳lóng被完全戳破。這mā是為甚麼當年摩西派出ê探á 回報講，當地ê人真koân大，根本無法度kah in相刣ê時，引起上帝極大ê受氣，準備用瘟疫懲罰in，後來iáu是因為摩西ê懇求、代禱，上帝chiah息怒，m̄-koh，上代祖先chit種對上帝m̄信ê結果，換來得tio̍h ê是「二十歲以上ê人，無一人進入hit所在」（參考民數記第十四章），原因是上帝bat tī in中間行過真chē神跡，m̄-koh in卻無將chiah-ê神跡所帶來ê信息、意義記tiâu-tiâu。chit-má，in ē-tàng親目看見、親耳聽見迦南地ê居民雖然外表體型高壯，城牆堅固，m̄-koh這並m̄是問題，只有上帝ê同在，chiah是性命ê氣力kah保障。Chit節mā同時回應了第二章9節喇合對兩個探á所講ê話：「我知上主已經 kā chit-ê 地賞賜 hō͘ lín，koh 因為 lín ê緣故阮lóng 真驚。所有tòa tī chit 所在ê 人民，tī lín ê 面前lóng 失膽。(全民版)」