約書亞記 22章1節 到 22章9節   背景資料  上一筆  下一筆
第廿二章到廿四章,是屬tī附錄,這三章mā是約書亞時代ê結束。Án-ne,tùi出埃及ê時代ê摩西開始,直到約書亞帶領以色列人民進入迦南地,就tī約書亞記完成以色列民族ê運動,這運動ē-sái講是「政治」性ê,是tùi被奴役到解放,得tio̍h自由ê運動。M̄-koh khah正確ê講法是:出埃及乃是非常典型ê「宗教改革」運動,是hō͘以色列人民因忽略了in祖先亞伯拉罕、以撒、雅各kah上帝之間所立ê約,而成做奴隸受苦,因為án-ne,出埃及記第二章以色列人民處tī「經過真chē 年了後,埃及王死。以色列人因為做苦工,就吐氣大聲hoah,上帝聽tio̍h in 做苦工大聲hoah ê 聲。上帝聽tio̍h in ê 哀聲吐氣,上主就想起祂kah 亞伯拉罕、以撒、雅各所立ê約。上帝看顧以色列人,上主mā 知影in ê tāi-chì。(全民版)」(出埃及記二:23─25),然後,tī約書亞記第廿一章結尾用「上主堅守伊向以色列人民所下ê一切諾言」作結束。

這「諾言」是teh指上帝bat應允beh kā迦南ê土地賜hō͘亞伯拉罕(參考創世記十五:18─20),mā bat án-ne應允過以撒(參考創世記廿六:3),chit種應允mā tī雅各ê身上出現(創世記廿八:13─15)。這mā就是為甚麼有kóa聖經學者歡喜將約書亞記看做是「六經」ê原因,認為約書亞記mā是繼續teh講述上帝kah以色列人之間約ê關係之經冊。

Chit段經文thang對照第一章12到18節,以及民數記第三十二章,約書亞照chìn前摩西ê應允,而且伊家己mā bat答應過ê事,hō͘呂便、迦得kah瑪拿西ê半個支族ê軍隊tńg去in已經分得ê土地—約旦河東岸。

第1節,這是約書亞帶領以色列人民進入迦南地,並且teh完成佔領迦南kah分配了土地了後,伊主動召集呂便、迦得,kah東瑪拿西等三個支族ê人來講關係in tńg去所分配ê土地約旦河東岸ê tāi-chì。

第2到5節,約書亞肯定chit三個支派ê人,確實是遵照所立ê約做tāi-chì,謹慎遵行上帝所命令ê事,並且無棄sak家己ê同胞。因為án-ne,伊宣佈這三支族出來協助征戰ê,lóng thang平安tńg去,並且勉勵in一定會遵守上帝hō͘ in旨意、命令,專心一意遵行上帝ê旨意。

第6到9節,chit三個支族確實遵照in chìn前所約定ê,kah其他支族ê人同齊攻打迦南地,並且佔領了hi̍t 所在,hō͘其他支族ê人mā thang得tio̍h土地khiā起,雖然有一部分土地iáu未得tio̍h,m̄-koh,約書亞認為in已經盡了責任,因為án-ne kā in遣tńg去,並且祝福in。作者tī chia強調ê是,in m̄-nā帶tńg來了約書亞ê祝福,mā帶tńg來了真chē戰利品tńg去厝裡鄉去,類似in祖先早年出埃及ê時chūn仝款。其實,in ē-tàng án-ne tńg去,mā teh表明in確實是照約書亞ê命令而tńg去ê。

重新查詢 專卷研經 約書亞記系列
錯誤回報,請聯繫