Chit段經文mā有續接約書亞記第十四章6到15節，有關迦勒來向約書亞要求分配希伯崙城hō͘伊，chit段攻打希伯崙城ê記事mā記載tī士師記第一章9到15節。

第13到14節，迦勒是kah約書亞同時受摩西差派去窺探迦南地ê支派領袖之一。有趣味ê是當時其他去窺探嘉南地支派ê領袖lóng強調講hi̍t 所在有亞衲族巨人，根本phah不贏，kan-taⁿ會送死。卻只有約書亞kah迦勒兩個人講應該tio̍h進入。當進入迦南地了後，迦勒親自要求去佔領亞衲族巨人所有ê城鎮。taⁿ希伯崙城成（chiâⁿ）實tú hông迦勒ê家族攻入了，koh kā亞衲三個kiáⁿ ê後代lóng趕出城去。

第15到17節，為tio̍h beh鼓舞兵丁勇敢攻基列‧西弗城，迦勒開出條件，甚麼人tāi先攻入，就kā家己ê cha-bó͘-kiáⁿ押撒嫁hō͘伊，結果迦勒ê小弟基納斯ê kiáⁿ俄陀聶攻落hit-ê城，迦勒照約束kā家己ê cha-bó͘-kiáⁿ嫁hō͘伊。Chit種酬賞ê方式後來mā被大衛王仿效（參考歷代志上十一：4—6）。

第18到19節，chit兩節mā thang看出俄陀聶kah迦勒ê cha-bó͘-kiáⁿ押撒真聰明，夫妻兩個人向老父迦勒要求到ê土地是有泉水ê田地，卻m̄是乾旱ê土地。