Chit段經文是猶大支族ê領袖迦勒得tio̍h希伯崙土地ê經過。

第6到8節，chit段經文thang參考民數記第十三章3到15節，摩西派各支族代表去窺探迦南地ê時，迦勒就是其中ê一位，伊是屬tī猶大支族ê基尼洗人耶孚尼ê kiáⁿ，kah約書亞是同時被派去ê人。伊kah約書亞兩人lóng是全力支持beh進入迦南地ê。Chia非常重要ê是，迦勒提起hit時伊已經四十歲。

第9到10節，伊kah約書亞提起摩西當年因為伊全力支持進入迦南地，而hō͘摩西賞識，進一步koh決定將希伯崙城分配給伊作產業（第13節）。第10節chia提起迦勒tī四十歲hit年跟tòe摩西，tī曠野漂流四十年，到八十五歲ê時chūn會得thang進入迦南地。Án-ne看起來，約書亞攻打迦南地大約有五年ê時間。迦勒屬tī猶大支族，伊tùi約書亞得tio̍h祝福，分配了希伯崙城，然後第十五章koh另外記載猶大支族分配ê土地，可見猶大支族所分配到ê土地比較多。

第11到12節，迦勒請求約書亞hō͘伊分配希伯崙城作產業，若是hit-pêng lóng是亞衲族巨人khiā起ê所在，目前伊身軀iáu強壯，ē-tàng攻打。這表示雖然亞衲巨人bat hō͘ hiah-ê kah迦勒、約書亞同齊去窺探ê其他支族代表感覺驚惶，m̄-koh迦勒iáu-koh表示伊並無擔憂，既然上帝應允，就會替伊將chiah-ê亞衲巨人趕出去。表示伊對上帝ê信心無改變。

第13到15節，就án-ne，約書亞照迦勒所請求ê將希伯崙城分配給迦勒，伊mā帶tio̍h家族順利佔領hit-ê城。