約書亞記 13章1節 到 13章7節   背景資料  上一筆  下一筆
Chit段長到九篇ê篇幅,lóng是記載以色列人分配所佔領ê土地有關事宜。Koh講,tio̍h瞭解以色列人對土地ê觀念是:土地乃是上帝所有,m̄是屬tī個人á是任何團體。上帝chiah是土地ê支配者。

Chit章主要提起三個主題:一是第1到7節,講tio̍hiáu有bē少地方是以色列人無完全佔領落來ê。二是第8到14節,chia講tio̍h tī約旦河東岸以色列有兩個半支派早就分配好土地à。三是tùi第15到33節,這部分講tio̍h tī東岸chit三個半支派分配ê土地範圍。

Chit段經文特別提起非利士人khiā起ê地區iáu未攻佔落來。Á非利士人mā是後來以色列人進入迦南地後,不時感覺頭殼痛ê族群,因為in不時騷擾以色列人ê khiā起安寧。

第1節,開始就講「約書亞已經老邁」,thang比較第十一章18節講ê:「約書亞kah chit-ê帶地區ê諸王爭戰了真久,終其尾擒獲了in,kā in處死。」可見tī進攻約旦河東岸地區確實用了真chē年日。第廿四章29節講約書亞往生ê時,是一百一十歲。A2kah約書亞同年代ê另外一位領袖人物迦勒(同時被摩西差派去窺探迦南地ê,參考民數記十三:3—15),則tī第十四章提起家己ê年齡是八十五歲(參考約書亞記十四:10),因為án-ne,chia雖然講約書亞已經老邁,ē-sái講是離開伊往生ê時間iáu有廿五年歲月ê時日。

Chit節開始就講約書亞已經年老,表示伊已經無法度繼續帶領以色列人,而chit句話其實mā為後來ê士師記埋落來伏筆。因為約書亞往生後,就無忠實而且優秀ê領導者來帶領以色列人。

第2到3節,談ê是非利士人khiā起ê所在,tī第3節提起非利士人有五個城市,包括有迦薩、亞實突、亞實基倫、迦特,以及以革倫等。

第4到5節,講tio̍h ê是迦南人、西頓人kah米亞拉、迦巴勒人等等ê地區。

第6節,這是屬tī khiā起tī山區上ê西頓人地區。

第7節,清楚說明約旦河西岸ê chit片迦南地,是beh分配給以色列九個半支派。

其實頂面所講chiah-ê敘述lóng tī說明,以色列人進入迦南地了後,一再ài面對chiah-ê iáu未降服in ê區域之人民。Á且mā受tio̍h chiah-ê民族ê民情、風俗,甚至宗教信仰ê影響。

Koh講,上帝beh約書亞先分配土地hō͘以色列各支族,為tio̍h是beh先佔領所得tio̍h ê土地,hō͘以色列人thang先安居落來,畢竟in tī曠野已經漂流四十年,mā需要一段時間滋生養息。約書亞ē-sái講是為以色列人phah開迦南地ê門戶,以後就一定tio̍h hō͘ in各族ê人去努力完成iáu未竟功ê大業。照士師記第三章4節:「上主留落來chiah-ê民族是beh考驗以色列人,看māi in是m̄是服從上主藉tio̍h摩西頒佈hō͘ in祖先ê誡命。」Tī chit塊土地頂面,beh考驗hiah-ê無經歷迦南戰事ê以色列人。伊ê目的是beh教以色列ê每一代學會曉相刣,尤其是從來無上過戰場ê人。後來士師記作者講以色列人tī約書亞kah kah伊同時代ê長老往生後,後代ê kiáⁿ孫確實墮落了,in bē記得上帝ê命令、誡命。這是非常可惜ê事。

重新查詢 專卷研經 約書亞記系列
錯誤回報,請聯繫