約書亞記 10章1節 到 10章14節   背景資料  上一筆  下一筆
Chit章主要記載基遍人kah以色列人簽訂合約,並且成做以色列人ê附庸國,致使迦南地各城邦、族群等國王lóng緊張起來,加上基遍原本就kah耶路撒冷等郡王無密切ê關係,就án-ne耶路撒冷王就決定聯合其他城邦郡主攻打基遍。Koh講,因為基遍tú好是阻擋以色列軍隊南下ê屏障,是國防ê重要位置,因為án-ne,chiah-ê族群會聯合來攻打基遍,mā是teh為家己ê安全作考慮。Á以色列既然成做基遍ê宗主國,就有責任保護基遍ê安全,因為án-ne,當chiah-ê邦城聯合起來攻打基遍ê時,基遍王隨時請求約書亞出兵援助,約書亞馬上派大軍去攻打亞摩利人ê聯軍。

Chit段經文記載耶路撒冷王亞多尼‧洗德聯合希伯倫、耶末、拉吉,kah伊磯倫等五個亞摩利王聯合起來進攻基遍。其實,chit種政策mā是耶路撒冷王teh對迦南地ê族群宣告:甚麼人kah以色列人合作,結果就會kah基遍ê遭遇仝款。是一種警告ê方式。

第1到5節,chia特別提起約書亞m̄-nā徹底毀滅了艾城,而且將hit-ê城ê國王刣死,chit種消息傳到迦南地各地區,必定會引起所有郡主、城邦領袖lóng大tio̍h驚、驚惶起來。特別是艾城位居險要ê地理位置,而且大城,lóng會被以色列人攻取落來,耶路撒冷koh khah是位居山丘,無容易攻落ê城堡,ná親像後來hit-ê城ê耶布斯人放話hō͘ beh帶兵攻打hit-ê城ê大衛講ê:「你若無除chiah-ê chheⁿ-mê-.êkah 跛腳ê,就bē-tàng 入來chit 所在。(全民版)」(撒母耳記下五:6)不過看tio̍h基遍降服tī以色列人,而且成做附庸國家,就án-ne決定聯合所有亞摩利人所khiā起ê頂面所講chiah-ê城ê王,先圍攻基遍,in認為只要ē-tàng將基遍攻打落來,就算以色列人想beh繼續進攻其他城鎮,mā難。

第6節,因為前一章有提起基遍人順服以色列,並且訂立了和平條約,表示基遍願意成做以色列ê附庸,所以基遍人就派人去傳話hō͘約書亞,kā伊講所有亞摩利人聯合起來攻打基遍,請求約書亞派兵來救援、幫助基遍。

第7到8節,約書亞派出大軍,而且精銳部隊前去救援,上帝mā藉chit-ê機會koh一pái kā約書亞講,ài伊m̄免驚惶,上帝會kah以色列ê軍隊同在。這mā表示chit場戰爭,會是上帝帶領以色列人征戰。

第9到11節,真清楚說明是上帝親自出手打擊亞摩利人,祂tùi天頂降落冰雹,hō͘亞摩利人無法度逃脫以色列軍隊ê突擊。另外一方面mā說明約書亞確實是一個聰明koh守約ê領導者,趁半暝率軍隊進攻圍困基遍ê亞摩利人。速度之快超出亞摩利人ê想像,mā因為án-ne,一聽tio̍h以色列軍隊來到,亞摩利人就驚到m̄敢迎戰而想beh逃離,上帝降落冰雹阻擋,結果士兵死傷慘重,單是hō͘冰雹phah死ê人,就比以色列軍隊koh khah chē。

第12到15節,mā是舊約聖經中非常奇特ê一段記事,chia提起約書亞向上帝祈禱,hō͘日頭kah月娘lóng停止bē振動,直到以色列軍隊phah敗仇敵亞摩利人。上帝因為應允chit pái ê戰爭,而且上帝mā親自phah亞摩利人。所以,上帝聽約書亞ê祈禱,日頭kah月娘lóng是上帝所創造,因為án-ne,lóng聽從了上帝ê命令,直到約書亞帶領ê以色列軍隊戰勝為止。Chit種祈禱天象改變ê記事,mā發生tī先知以利亞ê身上,伊祈求上帝mài落雨,mā不降甘露,長到三年ê時間,致使大地飢荒(列王記上十七:1-7、十八:1),說明ê是,如果是出tī上主ê旨意,就是天頂ê星辰mā會聽從。親像摩西tī埃及國王面前所引發出來ê各種災難就是一個例證。

約書亞ê chit首詩歌,記載tī「雅soah珥冊」上,另外,撒母耳記下第一章19到27節是一首大衛王為掃羅kah約拿單寫ê輓歌,mā記載tī「雅soah珥冊」上,這是一本記載「以色列戰史」ê史冊,m̄-koh並無編入聖經正典中。

作者強調一件事,並m̄是以色列軍隊精銳thang退敵,卻是:「上帝為以色列征戰!」chiah hō͘敵軍因為聽tio̍h ài面對以色列軍隊就驚惶失措,潰to̍h bē-sái得軍。另外一方面,這mā是teh表示約書亞kah摩西仝款,in lóng是上帝ê忠僕,in ê祈禱,上帝lóng會垂聽。

Chit段經文mā帶來一個重要ê信息:日頭、月娘,chit兩種星體是迦南人所崇拜ê神明,in mā聽從上帝ê指揮,這mā teh表示chit兩種星辰lóng m̄是神明,lóng是上帝所創造ê萬物之一,所有受造物lóng會聽從上帝ê命令。只有創造萬物ê上帝chiah是真正神。

重新查詢 專卷研經 約書亞記系列
錯誤回報,請聯繫